Dál son sávvá beassat váldit badjelasas doaimma Sámedikkis isida John Harald Skum maŋŋá, guhte lea ovddastan NSRa maŋimuš 8 jagi. – Munnje lea dehálaš ášši fitnet Álttá sámegiela hálddašanguvlui, dadjá son.

Eanet go dušše sánit

-Giella lea mearrideaddji juohke kultuvrii go olmmoš oahppá kultuvrra giela čađa, ja dan láhkái šaddá giella eanet go dušše sánit, dadjá Brita. Oahpaheaddjin son oaidná bures buot váilevašvuođaid mat leat odná skuvlladoaimmas. –Jus ovtta skuvllas váilo rehketoahpaheaddji de háhket johtilit sadjásačča, muhto jus sámegielas váilo oahpaheaddji de ii leat mahkkáš seamma dehálaš. -Dat čájeha ahte mii fertet nannet sámegiela stáhtusa skuvllas.

Gáhttet duoji

Britas lea maid ásahankurša duojis. –Mii fertet čalmmustahttit daid ollu čeahpes sámi nissoniid geat seailluhit min kultuvrra áimmiin ja suonain, danne hálidan mun dán fágan joatkaskuvlii, loahpaha golmma máná eadni Álttás.