Livččii sihkkarit movttiidahttán sihke Álttá ja Oslo searvat giellahálddašanguvlui. NSR dattege divvu gažaldaga lea go dát buoremus vuohki loktet sámegiela dán guovllus.
Skuvla maid dehálaš
- Vaikke lea dehálaš ahte ássiin livčče vuoigatvuohta gulahallat suohkaniin sámegillii, de lea vel dehálat fuolahit ahte skuvlla sámegieloahpahus doaibmá, cealká Randi Skum, NSR 2. evttohas Gáissi válgabiires.
Sámi viessu Romsii
- Lea maid dehálaš ásahit Sámi viesu Romsii. Doppe beasašeimmet sámástit, doallat sámegielkurssaid ja dát livčče nannen Gáisi giellaguovddáža doaimmaid, cealká Skum. Dát leat konkrehta doaimmat mat duođaid nannejit giela.
- Mii háliidit maid fállat sámegieloahpahusa ollesolbmuide, vai sii oččošedje stipeanddaid ja sámegieloahpahusa bargoáiggis, nu movt Gáivuona suohkanis, cealká Randi Skum.
Olu hástalusat maid ferte čoavdit
- Sámi mánáidgárdi berre viiddiduvvot. Dađi mielde maid mun dieđán, de ledje dán čavčča máŋga máná geat eai ožžon saji. Diehtit maid ahte sápmelaččat geat nuorran fárrejedje gávpogiidda, dál vuorasmuvvet ja dárbbašišgohtet fálaldagaid sámegillii. Dasa berre Romssa suohkan ráhkkanit, ákkastallá Randi Skum.
Kommenter denne artikkelen