Mii hálidat danne rápmot Álttá gieldda politihkkáriid og leat guhkás joavdán dáinna mearrádusain. Dán mearrádusas lea stuorra mearkkašupmi sámegiela boahtteáigái.
Állet vajáldahte historjjá!
Mii leat danne maid ilus go báikkálaš SG lei searvvis sámi luohkká ásahit. Lea seammás dehálaš ahte eat vajáldahte historjjá. SG Tommy Berg dadjá Altapostenii 14.08 ahte BB/SG ”lea nágodan čađahit eanet doaimmaid sámegiela ovddas go maid NSR lea dáhkan”. Dát cealkámuš orro čájeheamin ahte ii dieđe buoret.
Norgga Sámiid Riikkasearvi (NSR) lea sámi váldoorganisašuvdna mii aktiivválaččat bargá kultuvra-, servodat- ja diehtojuohkkindoaimmaiguin sin báikkálaš servviid čađa, ja okta dain lea Álttá Sámiid Searvi. Sámesearvi Álttás lea guoktelogi jagi doaimmahan sámi mánáidgárddi – go ii oktage eará leat hálidan váldit ovddasvástádusa addit sámi mánáide sámi mánáidgárdefálaldaga. Mii leat ráhčan ásahit sámi giellaguovddáža, ja mii leat fállan eatnat duodje- ja giellakurššaid áiggid čađa. Mii leat váldán ovddasvástádusa oažžut galbbaid golmma gillii Áltái ja Sámi álbmotbeaivvi doaluid lágidit.
NSR leamašan offelaš
NSR lea njealljelogi jagi SG ovddabealde go lea sáhka sámi giela ja kultuvrra ovddideamis. Ja bargu ii leat vel nohkan, nu ahte lea dieđusge bargu earáide maid geat beroštit áššiin. Dan oktavuođas hálidat sávvat Tommy Bergii ja SGii bures boahtima, go jo lea morihan, ja jus lea nu ahte Berg áigu vuorohit sámi áššiid dál ovddasguvlui.
Mii oaidnit maid ahte Tommy Berg dadjá Altapostenis 15.08 ahte ovddádusbellodat “suoláda” jienasteddjiid SGas sámi áššiid oktavuođas. Lea čielggas ahte Berg lea veahá láhppon go jáhkká ahte sámepolitihkka lea ráhkadit erohusaid olbmuid gaskii. Dá lea boasttu áddejupmi.
Sámeáššit eai earut
NSR ii hálit ahte galget šaddat stuorát erohusat olbmuid gaskii. Muhto baicce nuppeláhkái: - NSR bargá dan ovdii ahte sápmelaččain galget leat seamma vejolašvuođat ja fálaldagat servodagas. Okta ovdamearka lea ahte mii hálidat ahte sámi mánát – nu go dáža mánát – galget fállojuvvot oahpahusa iežaset gillii. Muhtin eará ovdamearka lea ahte galgá leat vejolašvuohta sámi ohppiide oahppat sámi historjjá ja kultuvrra birra skuvllas – nu mo dáža mánát dieđusge ohppet sin iežaset historjjá ja kultuvrra birra skuvllas.
Dál šaddá miellagiddevaš ja suohtas čuovvut Tommy Berg (SG) viidásat válgagiččus sámediggeválgga ektui. Nu mo Berg lea álggahan válgágičču de lea álki jáhkkit ahte son áinnas hálidivčče ovttasbargat ovddádusbellodagain sámi áššiid oktavuođas, ja nu go diehtit de hálidit sii heaittihit Sámedikki.
Oahppámuva Brita Juliannein Youtube:s
Kommenter denne artikkelen