- Olu daid fálaldagain mat mis dál leat sámi servodagas, nu go sámi mánáidgárddit, sámegieloahpahus skuvllain, sámi festiválat, sámi áviissat ja sámi girjjálašvuohta eai leat nuvttá boahtán. Ii leat mihkkege diehttelas áššiid ahte dát fálaldagat bisuhuvvojit boahtteáiggis, váruha Keskitalo.
Sihkastit eret sámeruđaid
Son čujuha dasa ahte Ob iežaset stádabušeahttaárvalusas earret eará evttohit sihkkut buot doarjaga sámi mánáidgárddiide, buot doarjaga sámegielat vuođđooahpahussii, buot doarjaga sámi áviissaide, ja evttohit maid čuohppat doarjaga sámi kulturdoaimmaide 50 milliuvnna ruvnnuin.
Mii dárbbašat nana Sámedikki
- Mii dárbbašat gievra ja stabiila Sámedikki eanet go goassige ovdal. NSRs lea áibbas nuppelágan oaidnu go Ovddádusbellodagas, ja mii eat bala dan čájeheamis. Njealljelogi jagiid čađa mii leat huksen sámi servodaga. Ovddádusbellodat sáhttá billistit visot dán jus besset fápmui. Danin ávžžuhan sámi jienasteddjiid jurdilit dárkilit ovdal go mánu geahčen galget jienastit, loahpaha presideantaevttohas Aili Keskitalo (NSR).
Kommenter denne artikkelen