Dávjá gohčodit NSR bellodahkan, ja mu mielas ii leat veara das beroštit, go mii han doaibmat politihkalaš bellodahkan sámediggeválggain. Lihkka leat mii maid eanet go dušše bellodat, mii leat sámi váldoorganisašuvdna geat njealljelogi jagiid čađa leat sámi kulturbargguid ja diehtojuohkima doaimmahan, lassin sámepolitihkalaš doaimmaide. Ii leat nu álki sirret sámepolitihkalaš bargguid kultuvrras ja diehtojuohkimis – máŋgii lea politihkalaš dahku jođihit sámi kulturbargguid. Danin lea ge mu mielas nu miellagiddevaš searvat NSR:a olu ieš guđet lágan bargguide.
Mii eat heive sin hiŋgaliidda
Go NSR ii heive dáčča definišuvnnaide ja málliide, de muhtimat dáinna duskkástuvvet, erenoamážit min politihkalaš gilvaleaddjit. Sidjiide dieđusge livčče álkit jus mii mieđihivččiimet ráddjet iežamet bargguid, ja divttášeimmet sin bidjat min juogo hiŋgalii “bellodat” dahje hiŋgalii “kulturorganisašuvdna”. Mii leat máŋgii gullan dakkár gáibádusaid. Eanetlohku NSR miellahtuin ja báikkálaš servviin leat hilgon dan, danin go NSR barggut ja organiserenmálle lea áiggiid čađa buktán bohtosiid. Sihke mii guoská sámediggevuogádaga huksemis ja báikkálaš kulturbarggus. Sámi organisašuvdnabarggut lea vuođustuvvon eaktodáhtolašvuhtii, ja go mii leat unnitlogus olu sámi guovlluin de eat oainne ávkki das ahte juohkit min bargguid máŋga ieš guđet organisašuvnnaide.
Áŋgiris miellahttut riggodahkan midjiide
Dán mearrádusas leat maid dieđusge váikkuhusat – min miellahtut geat sihtet searvat suohkan-, fylkka- ja stuorradiggeválggaide fertejit válljet eará politihkalaš vuođu dasa. Muhtin sajiin gávdno sámi molssaeaktu, nu go Sámiálbmot Bellodat. Eará sajiin leat dáčča bellodagat áidna molssaeaktun. NSR háliida miellahtuid geat beroštit ja áŋgiruššet servodatbargguin, ja danin leat min čalmmiin buorre ja riggodahkan go min miellahtut servet eará politihkalaš doaimmaide. Sáhtán muhtin muddui ipmirdit ahte politihkalaš bellodagain lea eará oaidnu, go sis ii leat nu govda sámepolitihkalaš doaibma.
NSR lea čielga molssaeaktun sámi jienasteddjiide
Dáčča bellodagat leat ieža, Stuorradikki bokte, dagahan ahte Sámediggi lea šaddan arenan sihke sidjiide ja sámi organisašuvnnaide ja bellodagaide. Sii fertejit dan mielde heivehit iežaset bargguid, eai ge gáibidit ahte sámi organisašuvnnat, dego NSR, galget diktit iežamet ráddjejuvvot eret nu mo dáčča bellodagaide heivešii buoremusat. NSR oainnu mielde mii leat buorre ja čielga molssaeaktun sámi jienasteddjiide.
Aili Keskitalo,
NSR jođiheaddji ja presideantaevttohas
Olav Gunnar Ballo falleha NSR
Elin Henriksen vástida
Hallgeir Strifeldt vástida