Dál fertejit politihkalaš jođiheaddjit Álttá suohkanis čoavdit ášši ja čájehit buorredáhtolašvuođa, gáibidit Norgga Sámiid Riikkasearvi (NSR) preassadieđáhusas.
- Dát ášši lea jorramin skandálan. Sámi váhnemat ja mánát Álttás leat guhká vuordán čielggadeami, ja gávcci beaivve ovdal go skuvla galgá álgit eai vel dieđe mánát guđe skuvlii sii galget álgit. Mun garrasit ávžžuhan Álttá suohkana čájehit buorredáhtolašvuođa dán áššis, ja háliidan muittuhit sin ahte sis lea vejolašvuohta fállat buoret sámegielfálaldaga go dan maid láhka gáibida, cealká presideantaevttohas Sámediggái Aili Keskitalo (NSR).
Ášši duogáš:
Váhnenjoavku Álttás leat gáibidan ahte ásahuvvo sierra sámi luohkká gos buot oahpahus galgá leat sámegillii. Oahpahuslága mielde lea suohkan geatnegahtton fállat dán jus unnimusat logi oahppit dan gáibidit.
Eahpesihkarvuohta sámegielluohká ektui sáhttá leat dagahan ahte muhtin váhnemat eai leat duođaštan ahte sii áigot geavahit fálaldaga. Dál leat ovcci ohppiid váhnemat geat sihtet sámegielluohká – okta unnit go unnimus mearri lágas. Vásáhusat čájehit ahte eambbosat servet dákkár fálaldagaide maŋŋil go vuos leat ásahuvvon.
Álttás álget skuvllat borgemánu 19. beaivve.
Kommenter denne artikkelen
Tips en venn Gå tilbake