Lohkkiidčállosis gieskat namuha Bargiidbellodaga Willy Ørnebakk daid doaimmaid maid BB sámediggeráđđi lea bidjan johtui maŋemuš guokte jagiid. Váttisvuohtan lea ahte dán politihkas ii leat ollislašvuohta – muhto vuolgá vuoruhemiiguin riikkadásis ja áššiiguin maid NSR-ráđđi bijai johtui.

Dađi bahát orru leamen stuorra erohus dan skuvlapolitihkas maid BB vuojeha riikkadásis, ja dan maid vuojeha Sámedikkis. Lean oalle sihkar das ahte dan beaivve go oahpahusministtar Norggas dajašii ahte ”boares skuvlagirjjit leat doarvái buorit” dáčča ohppiide, de bijahallošii oalle jođánit eret virggis. Muhto sámi servodagas gal lea vissa BB mielas áibbas ortnegis juohkit boares girjjiid.

NSR oaivvilda ahte sámi mánát ja sámi skuvla dárbbašit ođđa oahpponeavvuid – nu ahte min mánát eai bázahala ođđaáigásaš servodagas. go eará mánát geavahit dihtora oahpahusas – de galget min mánáin ge leat ođđaáigásaš ja ođasmáhttojuvvon oahpponeavvut.

Mii dárbbašat digaštallama
Sii geat leat olggobeal sámediggesystema ja divvot dehálaš gažaldagaid boares oahpponeavvuid ávkkis, steampalasttot dalán ”NSR-politihkkárin”, vaikke vel leat ge lágádusolbmot, rektorat sámi skuvllain dahje oahpaheaddjit geat fágalaš vuođu alde imaštit dán vuoruheami. Lea surgat ahte dehálaš digaštallamat hávkaduvvot ovdal go duođaid bohtet johtui.

Mii dárbbašit dáid digaštallamiid jus galgat ovdánit.

Suohkaniid ovddasvástádus lea dehálaš
Ørnebakk čállá: ”Dilálašvuođas gos hirbmat oallugat hilgot sámegiela, lea dušši digaštallat leatgo suohkanat bargan bargguset vai eai”. Dás son njuolgut duššindahká suohkaniid ovddasvástádusa sámi ohppiide. Dát han lea ge dat stuorámus hástalus sámi mánáide – erenoamážit sámelága hálddašanguovllu olggobealde. Nu mo suohkanat hálddašit sámi oahpahusa lea ovtta dain deháleamos eavttuin oččodit ohppiid lohkagoahtit fága sámegiela – ja sámi skuvlii oppalohkái. Dán ovddasvástádusa eat berre duššindahkat.

Sámediggi ferte baicce bidjat návccaid suohkaniid ektui jus galgat nákcet buoridit sámi mánáid skuvlaárgabeaivvi.