NSR YouTube siidu!
- Olu otná servodaga gulahallamis dáhpáhuvvá dál digitála máilmmis. Mii oaidnit eará sajiin máilmmis ahte interneahtta šaddá dehálat ja dehálat maiddái válggaid oktavuođas. Dan váldá NSR duođas. Mii deaivvadat sápmelaččaiguin doppe gos sápmelaččat leat – nammalassii neahtas, dadjá presideantaevttohas Aili Keskitalo (NSR). Son lasiha ahte dát dieđusge lea lassin dan dábálaš gulahallamii ja válgagižžui.
Gulahallat jienasteddjiiguin
NSR lea maid váldán atnui eará sosiála mediaid gulahallandihti sámi jienasteddjiiguin. – Mii leat Facebookas, Twitteris, Flickris, mii blogget ja mis lea iežamet ruovttusiidu. Dáppe sáhtte lohkat NSR doaluid birra, digaštallat áššiid ja doppe sáhttá politihkkáriin jearrat dan maid háliida, muitala Keskitalo.
Sámedikki birra ii gullo dáčča mediain
Sámediggeválggat lágiduvvojit oktanaga stuorradiggeválggain. Dat mielddisbuktá ahte dáčča mediat dábálaččat čállet unnán sámediggeválggaid birra, go stuorradiggeválggat váldet buot fuomášumi. – Interneahtta addá midjiide ođđa vejolašvuođa olahit jienasteddjiid min áigumušaiguin, čujuha Keskitalo, guhte sávvá ahte olbmot liikojit dán ođđa fálaldahkii.
Liŋkkat:
NSR YouTube siiddut: http://www.youtube.com/NSRvalg
NSR ruovttusiiddut: http://www.nsr.no
Presideantaevttohas Aili Keskitalo blogga: http://aili-keskitalo.blogspot.com/
NSR Twitteris: http://twitter.com/NSR_nyheter
NSR Flickris: http://www.flickr.com/photos/nsrbilder/
Kommenter denne artikkelen