Sámedikki doarjjastivra lea čoahkkinastán Árbordes ja leat juolludan oktiibuot 5,8 mill giellaruđain ja 4,5 mill sámeálbmot foanddas iešguđetlágan giellaprošeavttaide. 

Ovddidit servodatfága tearpmaid

Elgå skuvla oaččui 450 000 ru. Giellaovdánahttinprošektii Sámeálbmotfoandda bokte. Prošeavttas áigot ovddidit servodatfága tearpmaid ja ráhkadit álkes digitála oahpponeavvu servodatfágas. Tearpmat ja oahpponeavvu heivehuvvojit digitála fiilan ja interneahttafiilan, ja almmuhuvvojit lullisámi guovllu oahpaheddjiide. Prošeavtta olahusjoavku leat vuosttažettiin oahppit geain lea lullisámegiella vuosttašgiellan, 5.-7. ceahkis, ja oahppit geain lea lullisámegiella fágan. Heive maiddái oahpaheddjiide geat oahpahit lullisámegielas, sihke vuođđo- ja joatkkaskuvllas. Tearbmaovdánahttinprošeavtta bokte sáhttet sii hukset doabavuođu maid buohkat besset geavahit. Go prošeavtta "buktagat" galget leat olámuttus neahtas rabas geavaheapmái, de lea giellabarggus ávki olu eará surggiin go skuvllas, ja lea olles lullisámi álbmot beassá ávkkástallat das.   

Duopmustuollu sámegillii

Juolluduvvo maiddái doarjja SEG:i, Deanu gielddas, 150 000 ru. Prošeavttas galget jorgalit tearpmaid ráŋggáštusproseassa ja duopmostuollolága birra sámegillii. Prošeavtta ulbmil lea váikkuhit riektesihkkarvuođa nannema sámi álbmogii sámi riektegiela buori ovdánahttima bokte. Prošeavttas galget earret eará ovdánahttit juridihkalaš tearpmaid davvisámegillii ja sihkarastit kvalitehta departemeantta jorgalusain lágain ja láhkaásahusain. Tearpmat maid fágajoavku evttoha sáddejuvvojit Sámi giellalávdegoddái loahpalaš dohkkeheapmái. Prošeavttas plánejuvvojit guokte seminára sámegiela birra riektegiellan.