- NSR lea čađat oaivvildan ahte lea dehálaš čalmmustahttit álbmogii mo Sámediggi geavaha Sámeálbmot foandda ruđaid. Dát lea dehálaš danin go Sámediggi hálddaša ruđaid sámeálbmoga namas, oktasaš buhtadussan daid vahágiid ovddas maid dáruiduhttinpolitihkka lea mielddisbuktán, čilge Keskitalo.

Sámedikki ”gažadanboddu”

Dál son áigu diehttit maid Sámediggeráđđi lea dahkan sihkkarastindihti ahte sihke sii geat ožžot doarjaga ja earát dihtet ahte lea Sámeálbmotfoandda ruđat mat geavahuvvojit? Ášši loktejuvvo Sámedikki ”gažadanbottus” maŋŋebárgga 26.05.09.

Sámediggi rihkku njuolggadusaid?
 
NSR evttohusa mielde lea Sámediggi álggahan giellaovddidanprošeavtta ovttas Sámi allaskuvllain. Media bokte lea čuoččuhuvvon ahte dát prošeakta ii leat almmuhuvvon njuolggadusaid mielde.

- Lea šállošahtti ahte dákkár buorre ášši oažžu dakkár heajos beaggima, dadjá Aili Keskitalo, ja jearrá lea go duohta ahte njuolggadusaid eai leat čuvvon, ja maid dat mielddisbuktá Sámediggái dahje prošektii?

Loga eambbo sámeálbmotfoandda birra!