- Leamašan guhkes proseassa, ja lean ilus go viimmat leat lihkostuvvan. Jagis 2002 juo válddii Sámediggi, maid dalle NSR stivrii, oktavuođa Loabága suohkaniin dán áššis, ja mun ieš loktejin maŋemuš ášši Sámedikkis diibmá, muitala sámediggeáirras Ann-Mari Thomassen (NSR).
Buorre ovdamearka earáide
Mearkkaša ollu guovllu sámegieldillái ahte dál leat oassin hálddašanguovllus, ja mun sávan Loabát šaddá buorre ovdamearkan eará suohkaniidda mii guoská sámegiel vuoruheapmái. Erenoamážit mun sávan ahte Skánit ja Evenášši suohkanat dál čuovvolit, cealká Ann-Mari Thomassen (NSR).
Golggotmánu 1. b. erenoamáš beaivin
Loabága suohkan ozai jagi 2008 iežas beassat lahttun sámegiela hálddašanguvlui. Ráđđehus árvala jagi 2009 ođastuvvon nationálabušeahas lassin juolludit Sámediggái miljovnna ruvnnu dainna ulbmiliin ahte Loabága suohkan galgá searvat sámegiela hálddašanguovllu lahttun golggotmánu 1. beaivvi rájis.
Rámiida Loabága suohkana
- Mun háliidan rámidit Loabága suohkana go smihttet suohkana sámi boahtteáiggi birra ja oidnet árvvu sámivuođas. Go sii dál šaddet mielde hálddašanguovllus, de dat mielddisbuktá ahte Loabát suohkanis lea ovddasvástádus hálddašit sámegiela ja sámi kultuvrra buorrin sámi álbmogii suohkanis. Dat maid mielddisbuktá ahte Loabágis dál galgá sáhttit geavahit sámegiela maiddái almmolaš oktavuođain, ii ge dušše ruovttus gievkkanbeavddi birra, dadjá Ann-Mari Thomassen (NSR).
Kommenter denne artikkelen