Sámediggeáirras Tone Finnesen (NSR) oaivvilda leat buorre go Sámediggi čielggada makkár ehtalaš njuolggadusaid politihkkárat galget čuovvut.

- Mii fertet leat rahpasat ja čorgadat

- Sámediggepolitihkkáriin lea geatnegasvuohta láhttet nu ahte sis lea luohttámuš ja buorre beaggin. Mun oaivvildan leat dehálaš ahte mii álbmotválljejuvvon áirasiin čađat lea fokus etihkka beliide ja mii fertet álo atnit dáid njuolggadusaid muittus. Sápmi ii leat nu stuoris, ja danin lea erenoamáš dehálaš ahte mii váruhat nu ahte eat boađe dan dillái ahte oktage sáhttá eahpidit min bealátkeahtesvuođa. Lean ieš hui várrugas dáinna earret eará go lea sáhka ruhtajuolludemiin ja bušeahttaáššiin, dadjá Tone Finnesen (NSR).

Dá leat muhtin čuoggát ehtalaš njuolggadusain maid Sámediggi dál galgá mearridit:

Sámedikki politihkkárat galget:

1. čuovvut dáid njuolggadusaid árvvuid ja norpmaid.
2. doahttalit lágaid, láhkaásahusaid ja njuolggadusaid ja árvvus atnit Sámedikki njuolggadusaid.
3. fátmmasteaddji vugiin ja árvvusatnimiin viggat veahkehit sin geat ohcet veahki Sámedikkis dárbbuid ja áššáiguoskevašvuođa ektui.
4. leat dihtomielalaš sámi kultuvrra ja eallinvuogi erohusaide.
5. láhtten dan láhkái ahte Sámediggi adnojuvvo árvvus ja lassána máhttu ja áddejupmi sámepolitihkkii ja sámi servodahkii.
6. viggat garvit dilálašvuođaid mat sáhttet dagahit riidduid Sámedikki beroštumiid ja persovnnalaš oktavuođaid gaskii. Muđui čujuhuvvo hálddašanlága § 6 habilitehtagáibádussii.
7. ii dohkkehit alcces, iežas bearrašii dahje eará lagaš olbmuide erenoamáš ekonomalaš dahje earalágán ovdamuniid mat sáhttet áddejuvvot váikkuheaddjin, dahje sáhttit váikkuhit politihkalaš daguid ja mearrádusaid.
8. priváhta ii lohpidit maidege mii sáhttá váikkuhit bálvalusa Sámedikki ja geavaheddjiid beroštumiid vuostá.
9. váruhit vai oskkilduvvon dieđut maid oažžu Sámedikki áššemeannudeami oktavuođas adnojuvvojit árvvus, ja ii goassege geavahit oskkilduvvon dieđuid maid lea beassan oaidnit bálvalusastis persovnnalaš ovdamuniid joksamii dahje earáid soardimii mange láhkái.
10. fuolahit ahte buot dieđuid maid juohká barggustis Sámedikki ovddas leat riekta ja jáhkehahtti.
11. fuolahit ahte lea Sámediggi mii máksá mátkegoluid go lea Sámedikki politihkkárin ja doaibmá Sámedikki ovddas. Dán prinsihpas sáhttá spiehkastit dušše go Sámediggi lea dan earenoamážit dohkkehan.
12. čájehit čorgatvuođa ja govttolašvuođa ekonomalaš áššiin ja Sámedikki opmodaga oktavuođas.
13. ii bidjat hálddahussii gáibádusaid mat eai soaba sin bargguide ja geatnegasvuođaide, ja mat eai soaba áššálašvuhtii maid bargiin vuordá.