Juohke giellaguovddážii de lasihuvvo 300.000 ruvnnu boahtte jagi. Oktiibuot dát dagaha 2,7 milliuvnna ruvnnu ođđa giellaruđat.
NSR vuoruha giela
- Mii leat NSRs cealkán ahte mis lea dáhttu vuoruhit sámegiela, ja dát čájeha ahte mii oaivvildat duođaid. Jus min giella boahtteáiggis ge galgá leat ealli giella mii lea beaivválaččat ánus, de dat gáibida ahte mii ražastat. Mii geat leat sámepolitihkkárat fertet láhččit dili nu ahte giella sáhttá ovdánit ja bisuhuvvot báikegottiin. Dan oktavuođas oaivvildan giellaguovddážiid leat erenoamáš dehálaččat, cealká sámediggeáirras Klemet Erland Hætta (NSR).
Iežas evttohusas NSR ávžžuha giellaguovddážiid vuoruhit rávisolbmuide oahpahit sámegiela.
Giellaguovddážat mat ožžot lasi doarjaga boahtte jagi leat:
- Sámi giella- ja kulturguovddaš Porsáŋggus
- Ája Sámi giellaguovddaš Gáivuonas
- Árran julevsameguovdasj Divttasvuonas
- Várdobaiki Evenášis
- Isak Saba guovddaš Unjárggas
- SEG Deanus
- Moskavuona giellaguovddáš Romssa suohkanis
- Aajege sámi giella- ja gelbbolašvuođaguovddáš Plassjes
- Álttá Sámi Giellaguovddáš Álttás