Ohcanproseassa oažžut ruđaid sáhttá nuoraid mielas leat guhki ja moalkái, ja dát lea ge duogáš ásahit sierra nuoraidfoandda. Dákkár foanda movttidahtášii sámi nuoraid álggahit buriid doaimmaid iežaset lagasbirrasis.
Garvit guhkes ja moalkás proseassa
- Go mánát ja nuorat háliidit lágidit juoga, de sáhttá ruhtaohcan, prošeaktačilgehusaid čállin, rehketdoaluid ráhkadit, ohcamušaid sáddet jnv. Leat oalle balddihahtti. Ii leat dušše olu bargu, muhto ádjána maid ovdal go ožžot ruđaid. Dát ii doaimma bures go diehttit ahte mánát ja nuorat dávjá plánejit dušše moadde vahko ovddosguvlui, ja áinnas háliidivčče lágidit juoga boahtte vahkkoloahpa juo, cealká sámediggeáirras Susanne Amalie Andersen (NSR).
Váldojurdda Sámedikki nuoraidfoanddain lea:
- Álki ohcat ruđaid, áinnas interneahtta bokte, sihke ohcan ja rápporta
- Uhccán byrokratiija ja bábirbargu
- Smávva supmit
- Jođánis (dađis) juolludeamit