Báikkálaš bellodagat Deanus ja Kárášjogas vuostálastet dan maid Bb čuoččuha ráđđehusas ja Sámedikkis – ja buohkat dahket dego ii mihkkege! Nu čállá NSR presideantaevttohas dán lohkkiidčállosis.
Sámegiella lea min váibmoášši
Kárášjoga Bb jođiheaddji, Nils Johan Gaup, falleha NSR go mis lea čielga giellapolitihkka. Gaup lea áinnas bures boahttin čuovvut NSR riikkačoahkkimiid. Son de fuomášivčče ahte mii dulkot sámegiela ja dárogiela gaskkas, ja sárdnestuolus gullojit guktot gielat. Eanaš árvalusat leat guovtti gillii. Mii leat maid máŋggaid jagiid čađa doalahan guovttegielat fálaldaga min neahttasiidduin www.nsr.no. Makkár buori siskkáldas ovdamearkkat leat Bargiidbellodagas sámegiela ektui?
Duosttan čuoččuhit ahte NSR lea eanet guovttegielat go oktage eará sámi váldoorganisašuvdna dahje bellodat – ja nu han galgá ge leat! Sámegiella lea min váibmoášši!
Kárášjoga Bb háliida unnit sámegiela skuvllas
Kárášjoga Bb, Egil Olli báikkálaš bellodat, baicce oaivvilda leat dehálažžan ahte sámi nuorat ollejit guhkás dán máilbmis – ja de ii ábut geavahit beare olu áiggi ii ge návccaid sámegillii. Eat, oaivvilda Nils Johan Gaup: min nuorat fertejit oahppat albma dárogiela ja eŋgelasgiela vai birgejit stuorra máilmmis.
Mu belljiide dát lea dego gullat dološ Rønbecka.
Sámepolitihkarin ja eadnin mánáide geat otne leaba oahppin sámi skuvllas mun duođas oaivvildan: min hástalus lea addit mánáideamet ja nuoraideamet doarvái buori fálaldaga sámegillii ja sámegielas. Otná mánát ja nuorat han gal muđuid ge besset gullat belljiid dievva sihke dárogiela ja eŋgelasgiela!
Deanu Bb geahpedit guovttegielatvuođa
Deanu gielddas oaivvildit ahte Sámediggi ii atte doarvái doarjaga gokčat guovttegielatvuođa goluid gielddahálddahusas. Danin fertejit čuohppat guovttegielatvuođadoaimmaid ja baicce geavahit ruđaid loanaid ja reanttuid máksit. Lea menddo unnán ruhta – ja danin ferte vel ain geahpedit. Ádde gii áddeš!
Lea Deanu Bb mii jođiha Deanu gieldda, ja dát lea várrepresideantta Marianne Balto báikkálaš bellodat. Baltos lea ge giellaovddasvástádus sámediggeráđis. Son dahká dego Egil Olli, láhtte dego báikkálaš bellodat ii guoskka sutnje. Son baicce viggá sivahallat NSR dan botta go Deanu gielda lea billisteamen guovttegielatvuođa doarjjaortnega.
Dát lea sin duohta giellapolitihkka!
Sámegiella lea našunála ovddasvástádus. Muhto ii goitge ábut ahte Bb geavaha čáppa sániid das man dehálaš sámegiella lea, nu mo dahket Sd. dieđáhusas nr. 28, nu gohčoduvvon ”prinsihppadieđáhusas”. Go Bb ieš galgá árgabeaivvis vuoruhit bellodatkantuvrrain dahje gielddafeaskáriin, de ii leat šat sámegiella sidjiide nu dehálaš.
Lean guhká jurddašan ahte Bb dahkaluddá giellapolitihkas, ja dál mii leat duođaid beassan oaidnit duohtavuođa. Dat ii leat beare fávdnái.
Kommenter denne artikkelen
Kommentarer:
Bjarne Store av Elle 12.11.2008 21:20
Muhto dál lea BB bidjan dološ NSR-radikalara akcces diehtojuohkinhoavdan nu ahte DÁL GAL NJUOLGÁ BB giellapolitihkka maid, hei go hurgá!
Hirpmástahtti! av Áhčči 10.11.2008 17:13
Lean duođaid hirpmástuvvan mo Kárášjoga Bargiidbellodat oaidná sámegiela noađđin min mánáide. Lea go dát mearkan ahte sámegiela árvu lea unnumin min servodagas?