NSR dáhttu diehttit maid dearvvašvuođaministtar Bjarne Håkon Hanssen áigu dahkat buoridandihtii sámi dearvvašvuođafálaldagaid.

Dearvvašvuođaministtar galleda dán váhku Álttá, ovttas dearvvašvuođasuorggi ođđa ovttastahttinlávdegottiin. Norgga Sámiid Riikkasearvi (NSR) dáhttu dearvvašvuođaministaris jearrat muhtin áššiid birra maid mii leat ovdal lokten.

1. Mo áigu dearvvašvuođaministtar bearráigeahččat ahte sámi pasieanttaid dárbbut váldojit vuhtii ovttastahttinbargguin, go ii leat oktage sápmelaš dan ođđa lávdegottis maid son lea ásahan?

2. Mo áigu dearvvašvuođaministtar sihkkarastit ahte sámi pasieanttat ožžot govttolaš dulkonfálaldaga go dan dárbbašit?

3. Sámi našuvnnalaš gealboguovddáš - psykalaš dearvvasvuođasuddjen SÁNAG, fállá bálvalusaid olles sámi álbmogii, ovdamearkka dihtii Snoasas, Oslos ja Divttasvuonas. Lea go de buorre čoavddus ahte sii leat Finnmárkku-Dearvvašvuođa vuolde, mii lea “báikkálaš” dearvvašvuođadoaimmahat?

4. Sámi fálaldagat, nu mo SÁNAG, leat ain huksema vuolde, ja danin berrejit suddjejuvvot go muđuid leat čuohppamin bušeahtaid. Áigu go dearvvašvuođaministtar dahkat maidege sihkarastin dihtii dán?

5. Áigu go dearvvašvuođaministtar váikkuhit dasa ahte ásahuvvo gelbbolašvuođaguovddáš vuođđodearvvašvuođabálvalusas, nu mo Guovdageainnu suohkan lea árvalan?

6. Buot ámmátčehppodagat dearvvašvuođasuorggis sáhttet deaivvadit sámi pasieanttaiguin, ja berrejit danin dovdat sámi diliid. Áigu go dearvvašvuođaministtar ovttas Máhttodepartemeanttain sihkkarastit ahte biddjojit dákkár gáibádusat vuođđooahpuin?

Aili Keskitalo, Norgga Sámiid Riikkasearvi