- NSR riikkačoahkkin lea rámis go dákkár beakkán olmmoš Victoria Tauli-Corpuz lea boahtimin min ávvudanriikkačoahkkimii Guovdageainnus, cealká jođiheaddji Silje Karine Muotka.
ON eamiálbmot julggaštus mearriduvvui čakčamánu 13. beaivvi 2007. Eamiálbmogat barge 28 jagi dáinna áššiin. Riikkastivra lea hui rámis go beassat hupmat eamiálbmotjulggaštusa birra min ávvudanriikkačoahkkimis. ON bissovaš eamiálbmotforum lea dehálaš máilmmi eamiálbmogiidda. Ole Henrik Magga lei foruma vuosttaš jođiheaddji.
Forumkonferánssas boahtimin
Tauli-Corpuz boahtá njuolgga Romssas gos lea mielde Romssa universitehta forumkonferánssas mii lágiduvvo moadde beaivvi ovdal riikkačoahkkima. Forumkonferánssa birra sáhttá lohkat interneahtas www.sami.uit.no
ON eamiálbmot áššedovdi ruovttus fitnamin
Guovdageaidnulaš John Bernard Henriksen lea aitto válljejuvvon ON ođđa áššedovdijoavkku jođiheaddjin "Expert Mechanism on the Rights of Indigenous Peoples" ja son lea boahtimin NSR riikkačoahkkimii.
- Dr. polit ja sámi vuoigatvuođalávdegotti lahttu Else Grete Broderstad maid boahtá čilget iešmearrideami birra, cealká Muotka, gii illuda oahppat eambbo eamiálbmogiid iešmearrideami birra, ja ollu eará.
NSR boahtteáigi ja vássán áigi
- Ávvudanjahkečoahkkimis lea dieđusge dehálaš sihke politihkket, olbmuid deaivat, kulturdoaluide searvat ja veaháš geahččat maŋás ja ipmirdit movt NSR hui guhká lea bargan dáiguin áššiiguin, cealká Muotka.
– Mii leat bovden olbmuid geat ledje fárus 40 jagi áiggi go NSR ásahuvvui. Mii leat bovden ovddeš jođiheddjiid ja sámediggepresideanttat ja ollu eará olbmuid geat leat min dorjon ja minguin ovttasbargan. Ja riikkačoahkkináirasiid gaskkas leat oalle sihkkarit min boahttevaš sámediggeáirasat ja luohttámušolbmot – sihke nuoraidlávdegotti olbmot ja NSR sámediggejoavkku áirasat. Muotka lea duođaid illudeamen ávvudit NSR 40 jagibeaivvi ovdal go heaitá jođiheaddjin, muitala son.
Denne artikkelen på samisk
Kommenter denne artikkelen