Dán jagi leat sihke Ávvir ja Ságat šaddan beaiveáviisan, ja sámi álbmot oažžu dál beaivválaš ođđasiid sámi áššiid birra sihke sámegillii ja dárogillii. – NSR lea guhká bargan dan ala ahte sámi áviissaid preassadoarjja galgá lassánit, vai oažžut máŋggabealat sámi preassa sihke sámegillii ja dárogillii. Mii illudat go sámi beaiveáviissat viimmat leat duohtavuohta, ja mii dáhttut leat mielde váikkuheamen nu ahte dát áviissat ožžot buriid rámmaeavttuid ja ovdánanvejolašvuođaid, cealká Keskitalo.
Dehálaš gokčat viiddis guovllu
- Sámi ođasgaskkusteapmi ja servodatdigaštallan lea mielde čatnamin nannuset oktavuođaid sámi servodagaid gaskii. Danin lea dehálaš ahte media gokčá viiddis guovllu, ja lea ge movttiidahtti go oainnán Ságahis lea mihttomearri juste dan dahkat, lasiha Keskitalo.