Mun lean unnivuođa rájes ávvudan beassážiid ruovttus Guovdageainnus. Mu vuosttaš konseartamuitu lea muhtin juoigankonsearta álggogeahčen 70-logu.
Beassášdoalut Guovdageainnus leat rievdan nu ahte dasa maid lunddolaččat gullá eará go dušše girkostallan. Otne lágidit Sámi Musihkkafestivála ja Sámi filbmafestivála earret eará konsearttaid gos gullo sihke árbevirolaš luohti ja ođđaáigásaš musihkka, teáhteriid, filmmaid, semináraid ja eará miellagiddevaš doaluid.
Gievra báikkálaš čanastagat
Sámi festiválain leat gievra báikkálaš čanastagat, danin go leat álggahuvvon báikkálaš eaktodáhtolaš rahčamušaid čađa. Festiválaid čađaheapmi eaktuda dábálaččat ahte olbmot barget eaktodáhtolaččat.
Olu sámi festiválat leat ožžon almmolaš ruhtadeami, Sámedikkis, suohkaniin ja fylkkasuohkaniin. Okta festivála, Riddu Riđđu, lea ožžon guovddášstáhtusa, ja lea sihkarastán sierra juolludeami stádabušeahta bokte.
Ekonomalaš riska
Festiválaid lágideapmi mielddisbuktá riskka. Lea váttis árvvoštallat galles bohtet, ja dat mielddisbuktá ahte sin ekonomalaš dilli lea rašši. Danin lea ge almmolaš doarjja nu dehálaš, muhto eaktodáhtolaš barggu hága ii birge oktage festivála.
Sáhttá dagahit mánáidgárddi ovdii
Sámediggeráđđi lea namuhan máŋga sámi festiválaid iežaset ásahusdieđáhusas. Dainna ákkastallamiin ahte nannet sámi ásahusaid, de sii evttohit ahte sámi festivála Márkomeannu biddjo Várdobáikki giella- ja kulturguovddáža vuollái go dat lea sin lagasbirrasis.
Dađi bahát ii leat dán evttohusas čatnaseapmi ii festiválas iige Várdobáikkis. Márkomeannu álggaheaddjit dáhttot doalahit festivála báikkálaš stivrejumi, ja Várdobáiki ges ii dáhto váldit ovddasvástádusa festivála eahpesihkkaris ekonomalaš dilis.
Várdobáiki váldodoaibma, nu go mánáidgárdejođiheapmi, sáhttá gillát jus festiválas šaddá vuolláibáza.
Eai leat dárkilit jurddašan ášši?
Riddu Riđđu, geas lea guovddášstáhtus, lea áibbas eará dilis. Sis ii leat šat nu stuorra ekonomalaš riska, go leat ožžon fásta juolludemiid stáhtas. Sii leat maid oasálastán báikkálaš ovdánahttinbarggus gos leat veardidan ovttastahttima eará ásahusaiguin. Ovttastahttinplánat mat bohtet ovdan sámediggeráđi dieđáhusas lea ge danin muhtin muddui vuođustuvvon ásahusain.
Lihká ii oru sámediggeráđđi beare dárkilit jurddašan ášši, go gáibidit beali stivraláhtuin ođđa ásahusas. Mii geavvá báikkálaš čanaseapmái jus buot almmolaš ruhtajuolludeaddjit gáibidit stivrasaji dan mielde man olu sii juolludit ruđa? Ja mii de geavvá báikkálaš iešstivrejumiin – na, sámi iešmearridemiin?
Čielga váikkuhusat eaŋkilásahusaide
NSR oaivvilda ahte ásahusdieđáhus ii leat dušše ásahuspolitihka birra bajit dásis, nu mo sámediggeráđđi vikkaha. Dieđáhusas leat maid namuhuvvon máŋga konkrehta vuoruhuvvon doaibmabijut sihke oktiičaskimiid ektui, gáibádusat stivrasajiide ja njuolggadusrievdademiide. Dát gusket njuolga eaŋkilásahusaide.
NSR doarju gulaskuddan-gáibádusa
Danin mii šállošat go ásahusat eai leat beassan cealkit maidege dáid evttohusaide ovdalgihtii. Olu ásahusat leat goit ge váldán oktavuođa Sámedikkiin ja bivdán ahte dokumeanta sáddejuvvo gulaskuddamii ovdal go Sámediggi dan loahpalaččat meannuda. Dán gáibádusa doarju NSR, muhto sámediggeráđđi ii leat dássážii dasa miehtan.
NSR dáhttu evttohusaid sáddet gulaskuddamii, danin go mii dárbbašit gullat sámi festiválaid oaiviliid das maid Sámediggi sáhtašii sin ovddas bargat. Maid oaivvildit Sámi musihkkafestivála dahje Márkomeannu ahte Sámediggi sáhttá bargat nannendihti sámi festiválaid? Váillahit go sii Sámedikki oasálastima stivrabarggus – vai dáhttot go sii Sámedikki eará láhkai veahkehit? Leat go sis eará jurdagat mo festiválaid rašes ekonomalaš dili sáhttá buoridit, go ovttastahttit sin ásahusaiguin main lea áibbas eará doaibma ja mihtut? Kánske sii baicce dáhttot nannet festiválaid ovttasbarggu? Mo sáhttá Sámediggi dasa váikkuhit?
Dán dárbbaša Sámediggi diehttit! DANIN ferte ásahusdieđáhusa sáddet gulaskuddamii!
Kommenter denne artikkelen