NSR-riikkastivra lea rahpasit hállan presideantakandidáhta birra ja bovden báikkálaš servviid mielde riikkastivrra smiehttamiidda ja árvvoštallamiidda. Riikkastivra lea maid háliidan čuovvut dábálaš vieruid ja dábiid dákkár oktavuođain, ja dákkár oktavuođain galgá átnit arvvus sin geat háliidit leat kandidáhtat.

NSR-riikkastivra lea gulahallan buot báikkálaš servviiguin ja háleštan Norgga Sámiid Riikkasearvvi (NSR) presideantakandidáhta birra, sámediggeválgain 2009.

NSR-riikkastivra lea háleštettiin báikkálaš servviiguin vuohttán ahte sii čielgasit dorjot dálá kandidáhta, eai ge báikkálaš searvvit leat ovddidan eará kandidáhtaid formálalaččat.

Aili Keskitalo, riegádan 29.10.68 lea oahppan olmmoš guhte lea lohkan jođiheami mastergráda Copenhagen business schoolas. Keskitalo lea náitálan, sus leat golbma máná ja son ássá Guovdageainnus. Son lea giellalaš olmmoš gii hálddaša sihke sámegiela, dárogiela ja eŋgelasgiela.

Keskitalo buvttii ođđa jurdagiid ja jođihii NSR diplomáhtalaš vuogi mielde dan botta go lei NSR-jođiheaddji 2003-2005. Son válljejuvvui vuosttaš nisson sámediggepresideantan 2005 ja lei sámiid njunušvirggis sihke jállu ja árvvolaš. Keskitalo bivddii beassat eret sámediggeráđis 2007 ja beasai eret. Su váibmoáššit leat earret eará Sámeálbmotfoanda, árbevirolaš sámi máhtolašvuohta ja giellaáššit.

Duostlilis vugiin čájeha ođđa bálgáid politihkas, ja čájeha ahte nissonolbmuin leat sihke vejolašvuođat ja lunddolaš sadji politihkas. Opposišuvnnajođiheaddjin Keskitalo beaivválaččat doallá badjin višuvnnaid sámi servodaga bealis, ja čájeha ahte ovttaskas olbmos leat vejolašvuođat. Son dovdá bures NSR vuođđooainnu nannet sámegiela, kultuvrra ja oahpahusa. Kesktialos leat gulahallanattáldagat ja máhttá movttiidahttit. Son lea ovddastan min, sámiid, buori vuogi mielde, vaikko mis leat leamaš politihkalaš hástalusat.

NSR-riikkastivra lea dan oaivilas ahte Aili Keskitalo lea čeahpes jođiheaddji ja sus lea politihkalaš hárjaneapmi.

Gulahallan:

Silje Muotka, mobil 984 87 576
Aili Keskitalo, mobil 971 29 305

Sámediggeráđi politihkalaš rehkedollu Keskitalo presideantaáiggis.

Denne artikkelen på norsk.