Maid don áinnas borat ja jugat geassebáhkkan?
Lean mielde go Stuoranjárgga sámiid duodji čohkke miellahtuidis ja ráhkada gumposiid (gumba) maid vuvdet Márkomeannu festiválas. Go mii čoahkkanit maŋŋá vuoššama máisttašit movt dán jagáš gumposat šaddet, de lea hirbmat njálggat. Muhtumat botkalit sálttiid gumposiidda ja muhtumat gis bidjet sieráha dan ala. Dat lea hui njálggat sihke dálvebuollašiin ja geasseilmmis. Muhto, jos lea hui báhkka, de lea gal várra nu ahte olmmoš juhká čázi iige veaje dette borrat nu ollu.
Makkár musihkka addá dutnje geassedovddu?
Mánát vižžet musihka mobiltelefovdnii ja guldalit go mii vuodjit biillain. Dat sáhttá leat feara makkár musihkka Rolffa, Slincraze, Duolva Duottar ja eará maid vižžet mobiltelefovdnii. Muđui mii lávet guldalit dan musihka maid NRK Sámi Radio sádde, ja dat lea sihke sámi musihkka ja máilmmi musihkka.
Maid čájehivččet turisttaide geat fitnet du ruovttubáikkis?
Válddášin turisttaid mielde Vilgesvárrái dološ márkosámi dállui ja diŋgošin sidjiide mállása. Vuolggášeimmet vácci bajás Sáttiidvuomis ja borašeimmet čielgebierggu ja jugašeimmet liema doppe, Tore Johnsen luhtte. Son ja su siidaguoimmit jođihit unna mátkefitnodaga doppe.
Mii lea du geasseparadiijás?
Geasset lea buoremus leahkit fulkkiid ja ustibiid luhtte Skániin vaikko makkár dálki leaš. Jos arvá vahkoviissáid, de sáhttá leat buorre fitnat Ruoŧabealde Bottenviken mearragáttis. Muđui eai leat eará mátkeplánat.
Gean válddášit fárrui luomejeaggái?
Bovdešin Harstad Ovddádusbellodaga beakkána Per-Willy Amundsen fárrui luomejeaggái márkosámi gilážis. Lubmedettiin livččii buorre dilli háleštit sámi áššiin go son nu sakka berošta sámi áššiin. Son leage ovddádusbellodaga sámepolitihkalaš ovddasteaddji. Lean okte leamaš radiodebáhtas suinna ja dat ii lean ilgatge, vaikko leimme guovtti oaivilis, dieđusge.
Maid barggašit jus beasašit stádaministtarin ovtta beaivái?
Cokkašin gávtti ja doalašin sártni sámegillii ja dárogillii gierdavašvuođa ja ovttadássásašvuođa birra, ja mun várra maid giittášin Norgga álbmoga go Norga lea buorre riikka mas orrut. Ii dan ovtta beaivvis gearggašii nu ollu bargat, eará go symbolalaš daguid.
Maid barggašit jus beasašit kulturministtarin ovtta beaivái?
Mun bijašin johtui Várdobáiki sámi guovddáža huksema, ja vuoruhivččen musea-oasi. Dieđán ahte Sámis ii sáhte leat okta millionkulturviessu juohke njárggas, muhto vuoruhivččen Várdobáikki go Árran julevsámi guovddážiin ja Ája sámi guovddážiin de deavddašeimmet oppalaččat Romssas ja Nordlándda sámi kulturviessodárbbu.
Gii ánssáša rámi?
Nuorat geat jagi jagi maŋŋá lágidit Márkomeannu sámi musihkkafestivála Evenášis nuvttá bargguin ánssášit hui ollu rámi. Márkomeannu álggii NSR nuoraidsearvvi doallun, ja lea dál sturron ja šaddan iežas festivála nu movt buot NSR festiválat dađistaga leat šaddan. Olles bearaš illuda juohke jagi Márkomennui, Mánáidmennui, Muitalusmennui, Filbmafestiválažii ja olgokonsearttaide Gállogietti sámi olgomuseas ja mii leat maid mielde veaháš veahkeheamen eaktodáhtolaš bargin.
Geasselohkamuš?
Geasset logan Harstad Tidende ja Dagbladet go heive. Muđui finan ránnjáid luhtte guovlaleamen Fremover aviissa ja muhtomin ribahan váhkobláđiidge lohkalit. Ja de ferten dieđusge fitnat sihke nrk.no/sami ja NSR neahttasiidduid lohkamin vai dieđán mii dáhpáhuvvá. Mun logan dieđusge maid Ávvira ja Ságat, dat gal lea diehttelas. Eará geasselohkamuš mus ii leat.
Man haga it birge luomus?
In birge bearraša ja fulkkiid haga. Lean sin mielde ja sin luhtte olles geasi. Sávan buohkaide buori geasi!
Kommenter denne artikkelen