Maid leat plánen geasseluomus hommát?
Álggogeahčen luomu ledjen oanehis áigge Københámmanis ja Berlinas ovdal go fárriime ruoktot. Go viimmat lean ollen ruoktot áiggun eanaš leat ruovttus – earret ovtta dahje guokte festiválat. Lean jahkebeali ássan Københámmanis, ja dal áiggun dušše goarrut, mánástallat, bearrašiin ovttastallat ja eaktodáhtolaččat bargat Márkomeanuin.
Geasa attášit čuoikačuggestaga?
Alddán. Go lean ássan Københámmanis de in leat nákcen čuovvut mielde das mii dáhpáhuvvá ruovttus dahje Sámis – nu ahte čuoika juollu mu čuggestit!
Maid čájehivččet turisttaide geat fitnet du ruovttubáikkis?
Mun leamašan máŋggaid jagiid leamašan ofelaš Gállogiedde olgomuseas, ja dohko gal ledjen doalvut turisttaid. Áinnas Márkomeannu-áigge. Dalle besset vásihit márkosámi buoremus beliid!
Mii lea du geasseparadiijás?
Ramavuolle! Ruovttus eatni ja áhčči luhtte. Ii gostege gávdno njálgásat eananmuorjjit, buoret borramuš dahje čuovgaset ijat. Go min ja áhku vissui divvet fuolkkit, de lea geassi.
Gean válddášit fárrui luomejeaggái?
In oba eahpit ge – áhččán dieđusge (ja áhku jus son lei goastat). Áhčči dat dábálaččat murje min bearrašis, muhto mun láven čuovvut su deavdindihti iežan jiekŋaskábe. Áhčči šaddá dego eará olmmožin go moai lubmejetne dahje murrejetne, ja dasa mun gal duođaid liikon.
Maid barggašit jus beasašit stádaministtarin ovtta beaivái?
In jáhke geargat rievdadit nu olu jus beare ovtta beaivebotta beasan leat stádaministtarin, muhto jus njealji jahkái beasašin de gal dagahivččen Norgga máilmmi buoremus birasriikan.
Leat go mannamin makkárge festiválii dan geasi?
Mus leat gal dušše plánat vuolgit Márkomeannui ja Karlsøy festiválii, muhto jus dovddan iežan de lean gávdnamis Riddu Riđđus bearjadaga.
Gii ánssáša rámi?
Buohkat Márkomeannu-stivrras, go sii rahkadit nu buori festivála midjiide.
Rievtti mielde buohkat geat eaktodáhtolaččat barget Sámis – sin haga ii lean olus dáhpáhuvvat.
Geasselohkamuš?
Mus lea buorre doaivva ja vástidan čavčča skuvlagirjjiid!
Man haga it birge luomus?
Njálgga borramuša. Lea gal klišea, muhto goit nu duohta.
Stuorámus dáhpáhus geassit?
MÁRKOMEANNU! Ii leat geassi dan haga! Lea áibbas erenoamáš dovdu bearjadaga go oaidná ahte okta nubbi lávvu ceaggana gohttensadjái. Dalle lea geassi ja illu! Muhto in áiggu gal dadjat maidege dan dovddu birra mii láve leat sotnabeaivve go festivála lea nohkan ja lea čorgenáigi...
Ja maŋŋá geasi..?
Dalle boahtá čakča, ja dat mearkkaša ahte skuvla álgá Romssas. Mun nu liikon čakčii, ja illá sáhtán vuordit nahkehit gahpira, čeabetliinni ja fáhcaid fas!
Kommenter denne artikkelen