Mii lea du buoremus geassemuitu?
Vuoi, gal mus leat oba olu buorit geassemuittut – ja eanaš dain leat Divttasvuonas. In mun várra dárbbaš dan šat eambbo čiekŋudit …
Maid don áinnas borat ja jugat geassebáhkkan?
De gal boran grillaborramuša ja jugan čázi!
Maid čájehivččet turisttaide geat fitnet du ruovttubáikkis?
Dalle čájehivččen sidjiide Árran julevsámi guovddáža. Mu mielas oainnat lea dehálaš ahte turisttat besset oaidnit ja oahpásmuvvat julevsámi kultuvrii Divttasvuonas, ja dan sii besset Árranis. Árran han lea hui čáppa kulturvisti, ja doppe leat ollu čeahpes olbmot geat sáhttet muitalit min historjjá birra.
Mii lea du geasseparadiijás?
Kjær, Divttasvuonas! Doppe lea mis barta, ja lea máilmmi fiidnáseamos báiki – erenoamážit go buot min fuolkkit leat čoagganan dohko.
Gean válddášit fárrui ávdin sullui?
Iežan isida, go mun in oainne su nu dávjá. Go mun lean ruovttus, de lea son mátkkošteamen – ja nuppi láhkai.
Maid barggašit jus beasašit dearvvašvuođaministtarin ovtta beaivái?
De gal fertešin bajit prinsihpaiguin bargat. Nu mo ovdamearkka dihtii bidjat fuomášumi sámi buhcciid vuoigatvuođaide. Mun oaivvildan ahte sámi fálaldat ii galgga leat erenoamáš fálaldat, muhto goallostuvvot eará fálaldagaide. Mun ledjen maid geavahit vejolašvuođa hukset sámi gealboguovddážiid dearvvašvuođasuorggis, nu mo ovdamearkka dihtii sámi gealboguovddáš kronihkáriidda. Dainna áššiin han lea Sámiid Doaktáriid searvi dál bargamin. Dasa lassin lea dieđusge mu váibmoášši sámi dearvvašvuođaguovddáža ásaheapmi Divttasvuonas!
Gii ánssáša rámi?
Min joavkojođiheaddji Sámedikkis, Aili Keskitalo, gii nu johtilit máhcai politihkkii maŋŋá riegádahttima! Son čájeha maid son háliida NSR:in ja son čájeha ahte sus leat návccat! Son lea sámi nisu gii politihkke vaikke vel lea ge ožžon mánáid, ja nu son lea dehálaš ovdagovvan oallugiidda. Dan dihtii mun oaivvildan ahte son duođaid ánssáša rámi!