Doarjjastivrra jođiheaddji Ann-Mari Thomassen (NSR) háliida earenoamážit almmuhit čuovvovaš juolludemiid:

Lea dehálaš bisuhit dálá barggolašvuođa ja geavahanstruktuvrra eanandoalus, ja dán čoahkkimis ožžo ollu eanadoallit doarjaga geat dál galget álgit ođastit, viiddidit ja ođđa vistiid hukset iežaset doaluide.

10 eanandollui juolluduvvui oktiibuot 2 349 000,- ruvnnu.

Oahpahussuorgái juolluduvvui ruhta oahpponeavvoráhkadeapmái oktiibuot 16 907 400,- ruvnnu, ja dat lea oaivvilduvvon dábálaš ja digitála oahpponeavvuide sihke joatkkaoahpahussii, vuođđoskuvlii ja mánáidgárddiide.

Doarjjastivrra jođiheaddji, Ann-Mari Thomassen (NSR) háliida danne deattuhit ahte Sámediggi lea sihkkarastigoahtán buot dási ohppiide dan oahpahusa maid sis lea vuoigatvuohta oažžut ođđa máhttoloktema ektui. Prošeavttaid doarjja lea juolluduvvon Sámedikki 2008 bušeahta mearriduvvon eavttuid vuođul, gos ulbmil lea váikkuhit sámi oahpponeavvuid ovdáneami gustovaš oahppoplánabuktosa vuođul. 

Thomassen háliida maiddái ovdanbuktit 150 000 ruvdnosaš doarjaga mii juolluduvvui Oskal Siida AS:i Málatvuonas čađahit ovdaprošeavtta mas ulbmil lea ovdánahttit sámi vásáhusfálaldaga Málatvuona duottargillái, mii lea hui stuora mátkeealáhusáŋgiruššan Sis-Romssas ja gos leat olu ráhkadusat huksejuvvome. Oskal Siida AS šaddá dehálaš oassin sámi kultuvrra nannemis, čalmmustahttimis ja máhtolašvuođa loktemis guovllus gos lea okta dain stuorámus mátkeealáhusáŋgiruššamiin Davvi-Norggas.

- Lassin háliidan namuhit 150 000 ruvdnosaš doarjaga mii juolluduvvui Deanu joatkkaskuvlii geat ovttas IKU:in galget čađahit “Jurdagis lihkostupmái”- nammasaš gelbbolašvuođa- ja čuovvolanprográmma oaivvilduvvon válljejuvvon fitnodagaide, ulbmil lea ovddidit buriid gávpefuomášumiid ja dainna lágiin váikkuhit ahte ihtet eambbo ásaheaddjit sámi guovlluide, loahpaha doarjjastivrra jođiheaddji Ann-Mari Thomassen (NSR).