NSR lea oalle duhtavaš ođđa preassadoarjjaortnegiin mii mielddisbuktá ahte sihke davvi-, julev- ja máttasámegiella nannejuvvo. – Dát lea stuorra lávki ovddasguvlui. NSR lea guhkit áiggi badjel bargan dan ala ahte stuorát oassi doarjagis galgá leat dan mielde man olu buvttada. Dat mielddisbuktá ahte dađi eanet áviisa čállá sámegillii, dađi eanet doarjaga ožžot. Ođđa preassadoarjjaortnet doarju dán jurddašanvuogi, dadjá Keskitalo duđavaččat.
Gánnáhahtti čállit sámegillii
Aili oaivvilda ahte ferte leat gánnáhahtti čállit sámegillii, ja dainna lágiin movttiidahttit geavahit sámegiela aktiivvalaččat medias. – Dás ii leat dušše sáhka ođđasiid gaskkusteamis ja servodatdigaštallamis, muhto maiddái aktiivvalaš giellapolitihka birra, deattuha son.
Ferte ain nannet
- Dát lea buorre vuođđu mainna sáhttit viidáset bargat, muhto fertet vel ain nannet sámi preassadoarjaga ruhtadeami boahttevaš stádabušeahtain. Easka de sáhttá sihkkarastit buori ja máŋggabealat fálaldaga, dadjá Keskitalo.
NSR celkkii earret eará ná gulaskuddancealkámušas sámi aviisadoarjagiid láhkaásahusaid nuppástuhttima birra:
Mii oaivvildat hirbmat dehálažžan ahte preassadoarjja hábmejuvvo dan láhkai ahte njuolgga doarju sámegiela geavaheami – nu ahte mediat vuoruhit sámegiela vaikko livčče soames váttisvuođat sámegiela geavaheamis ođasgaskkusteamis.
NSR mielas berre vuoruhit ja addit lasi ruđaid daidda mediaide mat vuoruhit sámegiela – buot sámi suopmaniid – ja min mielas sii leat almmolaš doarjagiid váldoulbmiljoavku. Sámegiela geavaheapmi lea sámi kultuvrra vuođđu.