Dán vuoro lea Guovdageainnu Sámiid Searvi válljen turisma ja meahccevuodjin fáddán. – Sivva manin mii leat aiddo dán válljen, lea go mátkeealáhus lea áŋgiruššansuorgin Guovdageainnu suohkanis, muitala Aili ja lasiha ahte dál go ođđahotealla rahpasa, de lea dárbu fitnodagaide geat fállet turisttaide iešguđet vásáhusaid.
Hástala olbmuid boahtit
- Seammás diehtit dan ahte Mohtorfievroláhka ii báljo atte vejolašvuođa doalvut turisttaid meahccái. Mo dalle? Ja mii bat ekoturisma lea? Mearkkaša go dat áibbas eará vuogi movt turisttat sáhttet vásihit min luonddu, jearrá Aili Keskitalo gii sávvá ahte oallugat bohtet digaštallat dáid fáttáid.
GSS lea ge fitnen čeahpes olbmuid geat beroštit ja barget justa dáid fáttáiguin searvat panelii:
- Johan Ánte Somby, Duoddara ofelaš
- Mikkel Isak Eira, Sámi adventure ja Destinasjon Kautokeino
- Ánne-Lájlá Utsi, Bulet Eco Siida
- Klemet Erland Hætta, Guovdageainnu suohkan