Guovdageainnu sámiid searvi lea dán jagi, nu go ovdalge jagiid, čohkken nissonduojáriid duodjemárkaniidda ja leamaš mielde juohkimin Áillohaš muitobálkkašumi čeahpes musihkkárii Sámis. Nu boahtá ovdan sámiid searvvi jahkedieđáhusas.

Sámiid searvi lea mielde lágideamen Sámi musihkkafestivála. Dát lea gáibidan hui ollu návccaid ovddit stivrras/jođiheaddjis. Giitu ovddeš jođiheaddjái Márehii, ja maiddái Ellen J. Sara Eirai, go soai leaba GSS ovddastan Musihkkafestivála stivrras, ja giitu Kirsten Susanne Logjii ja Sten Olav Hættai, geat leaba produseanttajoavkkus mielde leamaš.

GSS lea lágidan 53 SOL-kurssa diibmá. Buorre bargu min oahppojođiheaddjis, Inger Marie Tornensisa bealis, SOLas ja dieđusge viššalis miellahtuin.

40- jagi ávvudeapmi čakčat

Aili Keskitalo maid muitala ahte searvi lea ráhkkaneamen NSR 40-jagiávvudeapmái čakčat. Searvi áigu leat mielde kulturprográmma hápmemim ja fállat miellahtuide ja earáide fáddáčoahkkimiid mas leat maid kulturdáhpahusat.

Politihkalaš barggut

Guovdageainnu sámiid searvvi ovddasteaddjit leat mannamin válgaseminárii Romssas dán vahkkoloahpa.

- Luohttámušolbmot galget beassat cealkit maid sii oaivvildit Norgga Sámiid Riikkasearvvi birra ja NSR barggu birra Sámedikkis, dadjá Aili Keskitalo ja diehtá máŋggas duođaid livčče háliidan ahte NSRs livččii čielga ja nanus eanetlohku Sámedikkkis.

Ovdal čakčamánu 1. beaivvi galget Guovdageainnus sámiid searvi, Kárášjoga sámiid searvi, Máze sámiid searvi ja Porsáŋggu sámiid searvi válljet daid olbmuid geat galget ovddastit sin searvvi ođđa válgastivrras Ávjováre válgabiires. Válgastivrra bargu šaddá čađahit buori nominašuvdnačoahkkima.

Denne artikkelen på norsk