Suodjalus ii šat geavat Nes Forta, ja dál pláne priváhta huksejeaddji ásahit dohko 600 astoáiggevisttiid, goanstasulluid ja turistabáikki. Huksenplánat mielddisbuktet diehttelasat maiddái bargosajiid – ja bargosajiide lea dárbu Lødingen suohkanis, čállá sámediggeáirras Kjersti Myrnes Balto (NSR) lohkkiidčállosis.

Boazodoallu massán guohtoneatnamiid

Muhto áššái gullá maid ahte heaittihuvvon forta lea dehálaš guohtoneana boazodollui dan guovllus. Boazodoallu Iinnasullos lea massán stuorra guohtonguovlluid sihke danin go gávpogat ja báikkit leat sturron, ja go leat omd. huksen ”Lofast” ja eará ge astoáiggehuksemat.

Duohtavuohta lea ahte odne leat Iinnasullos huksen juohke njárgii. Dát leat guovllut mat ovdal ledje guohtoneatnamat, deattuha Myrnes Balto.

Ii sáhte dušše bargosajiid buohtastahttit

Ii ášši leat nu álki ahte sáhttá dušše buohtastahttit galle bargosajit goappá ge ealáhusas leat. Boazodoallu lea sámi ealáhus mas lea viidát árvu go dušše bargosajiid dáfus – dat han lea dehálaš kulturguoddin maiddái. Jus mis galggaš boazodoallu boahtteáiggis ge, de fertet sihkarastit ahte boazodoalus leat guohtoneatnamat.

Fertet muitit ahte juohke sajis leat sisabahkkemat boazodoalu eatnamiidda, nu maiddái dán guovllus, cealká Davvi Nordlándda sámediggeáirras.

Váilo ollislaš areálaplánen

Mun jáhkán ahte váldováttisvuohta dán áššis lea go guovllus váilo ollislaš areálaplánen. Eat mii sáhte dušše dán ovtta guovllu geahččat, muhto ferte ollislaččat oaidnit buot guohtoneatnamiid maid leat massán. Danin mun ávžžuhan Birasgáhttendepartemeantta, gii loahpalaččat mearrida áššis, čađahit váikkuhusguorahallama ovdal go dahket mearrádusa.

Dákkár váikkuhusguorahallamis ferte váldit vuhtii man olu eatnamiid boazodoallu lea massán Iinnasullos maŋemuš 50 jagiid, ja buot huksemiid ja sisabahkkemiid geahččat oktii. Go huksemat plánejuvvojit mat dagahit ahte boazodoallu massá guohtoneatnamiid, de ferte seammás veardidit buhtadit dán ođđa guohtoneatnamiiguin, oaivvilda Kjersti Myrnes Balto.

Ii beroš miellačájáhusain

Deháleamos gažaldat lea ahte dáhttot go mii ahte Iinnasullos ain galgá leat boazodoallu 100 jagi geahčen. Norgga Sámiid Riikkasearvvi bealis gal sáhtán vástidit ahte dan mii dáhttot. Ja mii leat mielas dahkat dan mii dárbbašuvvo sihkkarastin dihte boazodoalu boahtteáiggi, vaikke vel dat mielddisbuktá ge ahte min vuostá lágiduvvojit miellačájáhusat. Mii sávvat ahte Birasgáhttendepartemeanta lea seamma oainnus, loahpaha sámediggeáirras Kjersti Myrnes Balto (NSR).