Doarjja juolluduvvui sihke guolástus-, duodje- ja eanadoallodoaimmaide. Kulturdoaimmaide juolluduvvui buohkanassii 4 028 000 ruvdnosaš doarjja.

Duodjái, lágádusaide ja ealáhusorganisašuvnnaide

Doarjjastivrra jođiheaddji Ann-Mari Thomassen háliida namuhit čuovvovaš juolludemiid:

Duodjeinstituhttii juolluduvvui 500 000 ruvdnosaš doarjja ásahit dakkár neahttauskkádaga duojáriid várás, mii sihke galgá nannet dujiid vuodaleami ja vuodima.

Sámi lágádusaide juolluduvvui buohkanssii šiega 2,5 miljon ruvdnosaš doarjja. Dákkár doarjaga ulbmil lea bisuhit ja ovddidit sámi lágádusdoaimmaid.

Viidáseappot juolluduvvui buohkanassii 500 000 ruvdnosaš doarjja 3 sámi ealáhusorganisašuvdnii. Dát doarjjaortnet galgá veahkehit nannet sin organisašuvdnadoaimmaid.

Skiippagurrafestivála oažžu doarjaga

Maiddái juolluduvvui doarjja sámi kulturfestiválaide, ja stivrajođiheaddji háliida dás namuhit 200 000 ruvdnosaš doarjaga Skiippagura festiválii Deanus. Sámi festiválat leat mielde čalmmustuhttimin sámiid ja eará álgoálbmogiid musihka ja kultuvrra ollu olbmuide.

Dorjot Suortta sámi muosáhusfitnodaga

Stivrajođiheaddji háliida maiddái namuhit 111 000 ruvdnosaš doarjaga Suortta sámi muosáhusfitnodahkii. Dakkár sámi mátkeealáhusfitnodaga álggaheapmi sihke nanne ja čalmmustuhttá olles Viestterállasa sámi kultuvrra ja servodateallima ja eaneda dieđuid dán guovllu sámi kultuvrra ja servodateallima birra.

Rabas álbmotčoahkkin ja čoahkkin gielddaiguin

Dan lassin dollojuvvui rabas álbmotčoahkkin Deanus mas muitaluvvui Sámedikki doaimma ja iešguđet doarjjaortnegiid birra. Maiddái dollojuvvi čoahkkin sihke Deanu ja Unjárgga gielddaiguin lotnolas diehtojuohkima várás, erenoamážit dán guovtti gieldda ealáhusovdeaneami birra, loahpaha stivrajođiheaddji Ann Mari Thomassen.