NSR riikkastivra ja SAB riikkastivra deaivvadedje oktasaš čoahkkimii. Dás hotealla tráhppás maŋŋá čoahkkima.

- NSRs ja SÁBs lea áibbas čielgasit oktasaš mihttomearri, namalassii ahte sámi beroštumit galget stivret Sámedikki. Dieđusge sáhttet buohkat cegget listtuid ja gilvalit sámediggeválggain, muhto min mielas berrejit sámi organisašuvnnat ja sámi bellodagat stivret Sámedikki, muitala SÁB-jođiheaddji Birger Nymo.

Ođđa válgaortnet

Boahtte sámediggeválggain leat 7 válgabiire, eaige šat 13 válgabiire nu movt ovdal leamašan, ja galget válljejuvvot unnit sámediggeáirasat go ovdal. Válgaboađus čielgá juo válgaija, iige ádján máŋga vahku nu go ovdal. Jienasteapmi maid rievdá ja olbmot geat orrot suohkaniin main leat unnán olbmot jienastuslogus eai beasa jienastit válgabeaivvi. Sii šaddet ovddalgihtii jienastit vai válga lea anonyma.

Ođđa válgabiiret leat:

1. Nuortaguovllu válgabiire
2. Ávjovári válgabiire
3. Davveguovllu válgabiire
4. Gáiseguovllu válgabiire
5. Viestarmera válggabijrra/Viesttarmeara válgabiire
6. Åarjel-Saepmie veeljemegievlie / Lullisámi válgabiire
7. Lulli-Norgga válgabiire

Válgadutki fuomášuhtii

Riikkastivrrat ledje bovden dutki Eva Josefsen čilget ođđa válgaortnega. Eva Josefsen lei Sámediggeválgga ekspeartalávdegotti láhttu. Sámediggi nammadii ekspeartalávdegotti ja gohčui sin evttohit ođđa válgaortnega.

- Gal mii dál duođaid fuomášeimmet mas lea sáhka ja movttáskeimmet bargat válgaráhkkananbargguid, muitala NSR-jođiheaddji Silje Muotka. – Nufal, hui buorre dán láhkái fuomášit daid hástalusaid mat mis leat, vástida Birger Nymo.

Njeallje válgabiire

Guktot riikkastivrrat leat jurdagiin ráhkkanan olles njeallje válgagiččuide ovdal go vejolaččat sáhttá vuoitit sámediggeválgga 2009. Vuos skuvlaválggat, dasto gilvu ovddalgihtii jienaid alde, dasto gilvu válgabeaivvi - ja loahpas vel dat gilvu mii dáhpáhuvvá válgaija go buohkat gilvalit buriid ovttasbargoguimmiid alde.

Luohtehahtti ovttasbargu dárbbašlaš

- Dál mii leat suokkardeamen makkár oktasaš ovttasbargovugiid mii galgat válljet. Mii áigut áibbas čielgasit muitalit min válljejeddjiide man láhkái min háliidit ovttasbargat ja mus lea buorre doaivva, loahpaha Silje Muotka.

Gulahallanolbmot:

NSR-leder Silje Muotka, mobil 984 87 576
SAB-leder Birger Nymo, mobil 911 65 610

Denne artikkelen på norsk