Olles Nuorta-Finnmárku lea boahtte sámediggeválgga rájis oktasaš válgabiire. Dát ođđa válgabiire galgá válljet 6 áirasa Sámediggái. Sihke NSR:a báikkálaš searvvit ja SáB leat ráhkkanišgoahtán ođđa hástalusaide maid válgabiiriid ovttastahttin mielddisbuktá.
Deanu SáB:as lea jahkečoahkkin seamma beaivvi, seamma báikkis, ja dalá maŋŋá DGSS:a čoahkkima. Dán čoahkkimis joatkašuvvá ášši digaštallan.
Massii áirasis
Odne lea oainnat sihke Deanu ja Várjjaga válgabiiriin NSR:as ja Sámeálbmot bellodagas oktasaš válgalista. Guktuid válgabiiriin lea oktasaš listtain okta sámediggeáirras. Deatnu massii áirasis go Jánoš Trosten geassádii ja ásahii iežas ovttaolbmo joavkku. - Mii fertet dál juo ráhkkanišgoahtit válggaide, go fertet uhcit eanet cegget ođđa oktasaš válgaorganisašuvnna stuoriduvvon válgabiirii, dadjaba Trond Are Anit, DGSS jođiheaddji, ja John Trygve Solbakk, Deanu SáB jođiheaddji.
Unjárggas guossit
Soai doaivuba maiddái ahte Unjárgga báikkálaš servviin boađášedje guossin sin jahkečoahkkimiidda. Deanu ja Unjárgga searvvit han álggahedje juo digaštallama oktasaščoahkkimis ovdalaš jahkemolsuma. Jahkečoahkkimis oassálasttii maiddái NSR:a jođiheaddji Silje Muotka.
Jahkečoahkkima áššelistu:
- Dohkkehit gohččuma
- Válljet čoahkkinjođiheaddji ja čálli
- Dohkkehit áššelisttu
- 2007 jahkedieđáhus
- 2007 rehketdoallu
- DGSS dállu. Mo dan boahtteáigi? Mo gokčat goluid ja dan geavahus.
- Sisaboahtán áššit
- Válljet luohttámušolbmuid
- Boahtte Sámedikki válgga hástalusat