NSR sámediggejoavkkus lea čielga mihttu ahte Sámediggi galgá ieš hálddašit sámi joatkkaoahppu. – Mii dovddahat goit ahte odne ii leat Sámediggi gearggus váldit dán ovddasvástádusa. Danin mii evttohat ahte dalán álggahuvvo guorahallan ahte mo dán sáhttá čađahit. Erenoamážit mii háliidat ahte galgá veardiduvvot ásahit sierra sámi ”oahppodirektoráhta” Sámedikki vuollái, cealká Sámedikki bajásšaddan- ja oahppolávdegotti jođiheaddji, Synnøve Solbakken-Härkönen preassadieđáhusas.
Sámediggeráđđi goazada ášši
NSR sámediggejoavku lea hirpmástuvvan go Sámediggeráđđi ii leat vuđolaččat čielggadan ášši. – NSR lea ovdal bivdán albma čielggadeami, muhto eat leat dan ožžon čađa. Dan mun sakka šállošan, danin go dat maŋida ášši vel ain eambbo, lohká Solbakken-Härkönen.
Ášši duogáš lea ahte stáhta, mii dássážii lea hálddašan sámi joatkkaskuvllaid, ii šat dáhto joatkit dainna. Sámedikki bajásšaddan- ja oahppolávdegoddi gieđahallá ášši dán váhkus.
Kommenter denne artikkelen