Gonagasreabbádieđáhusa ulbmilat čuvvot mealgadii Sámedikki mearrádusa áššis guovvamánus 2007. Dainna lean duhtavaš, go mii ražaimet ollu konsultašuvnnaiguin dán áššis departemeanttain.

Hálddašanváldi regionála dássái
Muhto leat ain muhtin dehálaš áššit maid eat leat vel ožžon čađa. Earret eará dan ahte guolásteaddji hálddašanváldi galggašii sirdojuvvot regionála álbmotválljejuvvon dássái. Ii eamiálbmotperspektiiva ge leat erenoamážit namuhuvvon gonagasreabbádieđáhusas. Danin lea buorre go maiddái dat ođđa sámediggeráđđi lea bargagoahtán áššiin. Mun rehkenasttán ahte várrepresideanta ovddida Sámedikki oainnu áššis go dás duohko ain deaivvada guovddáš eiseválddiiguin.

Lagašvuođa prinsihppa
Guolástuspolitihkas oaivvilda NSR ahte lagasvuođa- ja sorjjasvuođaprinsihppa ferte leat vuođđun hálddašeamis. Lea áibbas dárbbašlaš ahte guolásteami hálddašeapmi ovdána nu ahte báikeolbmot sáhttet ávkkástallat daid riggodagain mat leat láhkosis. NSR maid oaivvilda ahte nu mo gonagasreappá hálddašeapmi lei ovdal, de dat lei olbmuid riekteáddejumi vuostá daid guovlluin gos leat eanemus gonagasreabbát. Ollu guolásteaddjit geat ásset vuonain Nuorta-Finnmárkkus eai beassan searvat bivdimii, vaikke vel gonagasreabbá lei dagahan sin eallinláibbi ovdii.

Pedersen nanne lagašvuođa prinsihpa
Go Helga Pedersen dál dáhttu sierra bivdinlobi fatnasiidda vuollil 11 mehter dihto guovlluin Nuorta-Finnmárkkus, de mun dulkon dan nu ahte dat nanne lagašvuođa- ja sorjjasvuođaprinsihpa. Gonagasreabbá lea šaddan dehálaš vuođđun guolásteddjiid sisabohtui sámi vuonain Nuorta-Finnmárkkus. Mun doaivvun ahte ođđa hálddašanmodealla nanne bargovejolašvuođa ja ássama mearrasámi vuonain.

Sámediggi berre maid mielde
Mun oaivvildan ahte gonagasreabbá bivdohálddašeapmi sáhtašii leat buorre vuođđun geahččalit regionála hálddašanvuogi gos maiddái Sámediggi oasálastá. Dát sáhtašii leat buorre vuođđun boahtteáiggi guolástanhálddašeapmái. Go juo gonagasreabbábivdin lea šaddan dehálaš mearrasápmelaččaide, de lea lunddolaš ahte maiddái Sámediggi lea mielde dan hálddašeamen.

Ann-Mari Thomassen, NSR-sámediggeáirras