Bargiidbellodaga sámediggejoavku lohká iežas leat friddja eará bellodatorganain. Ja nu čuoččuhit vaikko sámepolitihkalaš ráđđi mearrida sin politihka, ja  riikkačoahkkin dat lea nammadan ollu dain áirasiin mat leat bargiidbellodaga sámepolitihkalaš ráđis. Bargiidbellodaga sámediggejoavkku ii oro sáhttimin váldit duođas go BB lea posišuvnnas sihke ráđđehusas, Stuorradikkis máŋga fylkkasuohkaniin ja Sámedikkis. NSR lea opposišuvnnas ja de lea deháleappot go goassege ovdal ahte sámi jietna beassá gullot – almmolašvuođas – iige dušše bellodatkantuvrrain.

Dál sii leat leamaš posišuvnnas Sámedikkis moadde mánu, muhto orrot leamen oalle bastteheamit, ja hui gitta eatnibellodagas, ráđđehusas dahje fylkkabellodagain. Mis leat varas ovdamearkkat:

• Bali dálkkádatkonferánssas eai lean sámi ovddasteaddjit:

Ráđđehus "vajáldahtii" eamiálbmogiid ovddasteaddji váldit mielde go vulge Bali dálkkádatkonferansii dievva olbmuiguin. Ráđđehusa davviguovlopolitihkas sii gal leat deattuhan eamiálbmotperspektiivva ja birasperspektiivva. Sámediggepresideanta Olli mielas dát ii lean stuorra ášši, nu guhká go ieš beasai searvat Nobel bálkkašumi. NSR mielas sápmelaš ovddasteaddjit galget leat mielde daid sajiin gos mearrádusat dahkkojuvvojit, iige de leat doarvái golgat bankeahtain ja konsearttain.

• Statkraft ja Norfund investeremat čáhcefápmohuksemiin eamiálbmotguovlluin:

Stáhtafitnodagat maid Norga oamasta leat investeren huksenprošeavttaide Peruas, ja huksemat uhkidit Mapuche-indiánariid. Mapuche-indiánarat bivdet veahki sihke Norgga eiseválddiin ja Sámedikkis. Ráđđehus váldá ášši duođas – muhto sámediggepresideanta ii dáhto maidege cealkit áššái danne go ášši lea "olgoriikkapolitihkka". NSR mielas Sámediggi berre cealkit oaiviliiddis go fitnodagat maid Norgga stáhta oamasta barget eamiálbmogiid guovlluin. Dát lea eamiálbmotpolitihkka.

• Váilevaš politihkalaš konsultašuvnnat:

Ovdal Sámedikki fápmomolsuma, de čađahuvvojedje ollu konsultašuvnnat Sámedikki ja ráđđehusa politihkalaš dásiin, konsultašuvdnašiehtadusa olis. Konsultašuvnnain lea sáhka dehálaš láhkaproseassain maiguin ráđđehusas lei hirbmat hoahppu geargat. Maŋŋá go BB ásahii sámediggeráđi, de ii leat leamaš ii oktage politihkalaš konsultašuvdnačoahkkin – opposišuvnna dieđuid mielde. Eai bat leat šat konsultašuvnnat danne go buot áššit mearriduvvojit Youngstorgetis – vai lea go nu ahte opposišuvdna ii oaččo dieđuid? NSR imašta lea go nu ahte konsultašuvdnašiehtadusaid ii nagot čađahit go BB lea guktot bealde  beavddi?

• Boazodoallu guovllustivrraid nammadeapmi:

Ovdal fápmomolsuma, de čálii Sámediggi reivve buot fylkkasuohkaniidda davvin ja čilgii man dehálaš lea gulahallat ovdal go boazodoalu guovllustivrrat nammaduvvojit. Ovddit sámediggeráđđi háliidii bearráigeahččat ahte boazosápmelaččat besse eanetlohkui guovllustivrrain ja ožžo guovllustivrra jođiheaddji. Dát lea hui dehálaš dál go mis lea ođđa boazodoalloláhka, ja guovllustivrraide lea addojuvvon lasi fápmu. Sámediggeráđđi čálii reivve danne go Sámedikkis leat ovttasbargosoahpamušat fylkkasuohkaniiguin Hedmárkkus davás. Dákkár gulahallan ii leat ásahuvvon. Davvi-Trøndelága boazodoalloealáhus leat duhtameahttumat dainna jođiheddjiin maid fylkkasuohkan lea nammadan. Dát lea áibbas nuppeládje go dat maid Davvi-Trøndelága Fylkkaráđđi Annikken Kjær Haraldsen celkkii sámekonferánssas Romssas 10.11.07. Son rámiidii BB-fylkkaráđi bealis buori ovttasbarggu mii galgá leat fylkkasuohkana ja boazodoalu gaskkas fylkkas.

BB lea Sámedikki posišuvnnas hui láivi go lea sáhka sin iežas ráđđehusa – ja sin iežaset Fylkkaráđiid sámepolitihka ektui. Leat go dát dušše aitto-álggahalli láivivuohta, vai lea go dát jurddašuvvon rievttes vuohkin oažžut buriid bohtosiid? Sámedikki rolla cuiggodeaddjin  dehálaš eamiálbmotáššiin ja sámi áššiin gal billehuvvo jos ná lávit galgá joatkit. NSR bealis mii vuordit ahte sámediggeráđđi njulge čielggi ja sadjá sáitti go ságastallá bellodatustibiiguin Stuorradikkis, ráđđehusas ja fylkkasuohkanis. Dat lea áibbas dárbbašlaš jos Sámedikki galgá sáhttit váldit duođas.

NSR ovddas
Aili Keskitalo, parlamentáralaš jođiheaddji ja Silje Muotka, jođiheaddji