NSRa sámediggejoavku garrasit moaitá “Norwegian Lapland” nama geavaheami. Sánit  Lappland ja lapper leat vealahansánit maid mii jáhkiimet áigá juo ledje heaitán geavaheamis, celket sii preassadieđáhusas.  

Állet vikka áddestallat Suoma

- Finnmark Reiseliv lea almmolaš ruhtaduvvon mátkeealáhusorganisašuvdna, ja danin sis lea ovddasvástádus márkanastit sámi kultuvrra dan láhkai ahte maiddái sámi álbmot dovdá dan buorrin. Lea sihke boastut, vealaheaddji ja maiddái issoras go namahusain ”Norwegian Lapland” dál galget vuovdalit min kultuvrra, cealká NSRa sámediggeáirras Gunn-Britt Retter.

NSR mielas orru Finnmark Reiseliv dál viggamin álkes vuogi mielde čuovvolit Suoma mátkeealáhusa bivnnuhisvuođa man mii diehttit lea buktán stuorra ruđaid. Muhto Finnmark Reiseliv ii berrešii geahččalit buohtastahttit ja áddestallat Suoma mátkeealáhusa das mo sii meannudit sápmelaččaid.

Ferte adnit árvvus

- NSR mielas lea buorre go sámi vásáhusaid, doaimmaid ja mátkkoštanbáikkiid márkanastin nannejuvvo, muhto dat ferte dahkkot nu ahte sámi kultuvra ja sápmelaččat adnojuvvojit árvvus ja dat ferte leat sápmelaččaid iežaset eavttuid vuođul, deattuha Retter.