Kristin Halvorsen cállá reivves ahte vuojániid klassifiseren mearrida man ollu divvadat dain galget leat. ATV, skohter ja mohtorsihkkelat adnojuvvojit olbmofievrun ja divvadat máksojuvvojit dan mielde. Njuolggadusat leat dan láhkái ráhkaduvvon ahte fievrrut maid boanddat geavahit eanandoalus ožžot eará divvadiid. Fievrrut maid boazodoallit geavahit leat dakkárat maid olbmot muduige geavahit, ja danne dain leat dakkár divvadat. – Mii berret bargat dan badjelii ahte ovdamearkka dihte ATV ja skohterat klassifiserejuvvojit dan láhkái ahte sáhttá gohcodit ealáhusvuojániin, ovdamearkka dihte boazodoalus, nu ahte sáhttá geahpedit divvadiid go vuoján geavahuvvo ealáhusa oktavuodas, cealká Silje Karine Muotka.

- Ii sáhte ákkastallat ahte mis leat dábálaš divvadat maidda ii sáhte ráhkadit sierranjuolggadusaid go lea sáhka ealáhusain. Dat ii doala deaivasa, oaivvilda Muotka. – Eiseválddit eai leat ceahpit differensieret divvadiid. Mu mielas lea oalle imaš go finánsaministtar oaivvilda ahte ii sáhte gávdnat covdosa dán áššái, cealká Muotka ja muittuha ahte boazodoallu lea sierra sámi ealáhus Norgga bealde.

Norgga Sámiid Riikkasearvi oaivvilda duodalaš áššin ahte eiseválddit meannudit eanandoalu ja boazodoalu guovtteláhkái dán divatáššis. – Dán sáhttá gohcodit ealáhusvealaheapmin, cealká Muotka. – Mun in ipmir mii lea dán guovtti ealáhusa erohus. Guktot ealáhusain lea dárbu háhkat veahkkeneavvuid ja eiseválddiin han leat juo ortnegat, nu go ovdamearkka dihte momsageahpideapmi, go lea sáhka veahkkeneavvuid háhkamis.

Gulahallanolmmoš:
Jodiheaddji Silje Karine Muotka, tlf. 98487576
Norgga Sámiid Riikkasearvi (NSR)

NSR-jodiheaddji sárdni Norgga Boazosápmelaccaid 60-jagi ávvudeamis 2007

Vuordá divatluvvema boazodollui

Denne artikkelen på norsk