Riikkarevišuvnna doahttalit
NSR sámediggejoavku lea duhtavaš go sámediggeráđđi evttoha rievdadit  Sámedikki ohcanláhkái doarjjaortnegiid njuolggadusaid vai njuolggadusat heivejit Brønnøysund registara ja Stáhta ekonomiijastivrejumi njuolggadusaide. Go Riikkarevišuvdna cuoiggoda Sámedikki doarjjaortnegiid, de dat ii leat dohkálaš. Sámediggi ferte revišuvnna oktavuođas bargat dan mii lea dárbbašlaš njulget dili.

Dehálaš doarjjaortnegat
Sámedikki doaibmabidjo-ortnegat leat dehálaš reaiddut nannet sámegiela ja sámi kultuvrra ja váikkuhit buriid bohtosiidda servodagas ja buriid bohtosiidda geavaheddjiide. Váikkuhusat galggašedje leat dakkárat maid sáhttá mihtidit. Bajit dási njuolggadusat leat áibbas dárbbašlaččat danne go daid bokte galgá leat vejolaš árvvoštallat lea go doaimmas ávki ja veahkehit válljet daid doaimmaid main lea ávki. Mii jáhkkit dát nuppástusat mat dál čađahuvvojit nannejit politihkkáriid vejolašvuođaid stivret man láhkái Sámedikki doarjjaortnegat geavahuvvojit.

Álkkit doarjjaohcciide
NSR ovttasbargojoavku lea dan oaivilis ahte šaddá álkit sihke doarjjaohcciide ja doajjajuolludeddjiide go bohtet oktasaš njuolggadusat buotlágán doarjjaortnegiidda. Sámediggi ii šat dárbbaš geavahit nu ollu návccaid doarjja-juohkimiidda go lea okta ortnet. Dál leat máŋga ortnega maidda ferte geavhit návccaid. Dákkár oktasaš ortnegiin beassá eret divrras evaluerenbargguin maid dál lea šaddan čađahit oalle jámma.

Bušeahttabargu stivre
Dál galgá Sámediggi čilget masa ruhta galgá mannat, ja dat galgá čilgejuvvot bušeahtas masa biddjojuvvojit strategiijat, doaibmabijut ja mihttomearit. Dáinna lágiin sáhttá mihtidit man láhkái ruđat leat boahtán ávkin sámi álbmogii. Bušeahta bokte sáhttá reguleret ja heivehit ortnegiid juohke jagi, ja heivehit daidda servodatváikkuhusaide ja geavaheaddjiváikkuhusaid maid Sámedikki dievasčoahkkin háliida olahit.

Denne artikkelen på norsk