- Lean ikte hállan Guovdageainnu sámiid searvvi stivralahtuiguin ja buohkat dorjot sámediggepresideantta. Mii leat duhtavaččat go Aili Keskitalo vuoruhii Sámedikki ja NSR integritehta ja beaggima go loahpahii ovttasbarggu Johan Mikkel Sarain, cealká Meløy Utsi.

- Aili Keskitalo lea čeahpes jođiheaddji, joatká Meløy Utsi. – Mun lean ovttasbargan suinna go son leai Guovdageainnu sámiid searvvi jođiheaddji, NSR jođiheaddji ja dál Norgga Sámedikki bajimus jođiheaddji. Son máhttá sihke čađahit áššiid ja fuolahit olbmuid dárbbuid, loahpaha Meløy Utsi.

Báikkálaš searvvi dorjot
Lulli-Romssa ja Davvi-Nordlándda báikkálaš searvvit sihke dorjot ja rámidit sámediggepresideantta Aili Keskitalo, NSR jođihangotti ja NSR sámediggejoavkku go leat čájehan čađahannávccaid, ja čájehan integritehta Sámediggái ja sámi álbmogii. Mii leat máŋgii vásihan man váttis politihkalaš ja olmmošlaš ovttasbargu lea leamaš listtuin ”Sámit geat ásset Lulli-Norggas”. Mii geat leat NSR báikkálaš servviin dáppe leat ožžon dieđuid dan proseassa birra mii lea čađahuvvon ja mii doarjut NSR sámediggejoavkku mearrádusa áibbas. Nu celket sámesearvvit Stuornjárgga Sámenuorak, Iinna ja biras sámiid searvi, Harstad sámesearvi ja Ráhkká ja biras sámiid searvi oktasaš cealkámušas.

Eahperievttálaš gáibádusat
- Suorganin go gullen Johan Mikkel Sara gáibišgođii šiehtadallat áššis áššái, cealká Porsáŋggu sámiid searvvi jođiheaddji Sigvald Persen. – Nu ii oro leamen riekta, iige dat leat demokráhtalaččat buorre. – Mun doarjjun Aili Keskitalo ja mu mielas ii galgga okta eaŋkilolmmoš beassat dikteret NSRa. - Skuniheapmi go viggá duvdilit buot siva NSRii dán áššis, nu lea goittot mu oaivil, cealká Ráhká ja biras sámiid searvvi jođiheaddji Bjørn Inge Nylund.

Romssa sámiid searvvi jođiheaddji Anita Lervoll cealká jierpmálažžan ja riekta lihccut Johan Mikkel Sara. – Mii han jienasteimmet Aili Keskitalo ja NSR ja livččiimet duođaid beahtahallan jos NSR livččii bidjan muhtun ovttaskaslisttu olbmo presideantta sadjái. Joavkojođiheaddji Lene Hansen ja sámediggepresideanta barggaiga buori barggu preassakonferánssas ja mii leat rámis ja gába go leaba dahkan dákkár mearrádusa dán áššis.

- Sálto sámesiebre NSR jođiheaddji, Eivind Langås doarju Aili Keskitalo ja oaivvilda áibbas riekta juoga bargat dál. Luohttámuš ii boađe iešalddis. Dan ovddas ferte bargat. Mun sávan ahte buorit šiehtadallamat sáhttet buktit buori bohtosa nu ahte Aili Keskitalo beassá joatkit sámediggepresideantan.

Organisašuvnna máŋga dási searvalaga
- NSR ii oro mu mielas háddjáneamen dán áššis, cealká NSR-jođiheaddji Silje Karine Muotka. NSR jođiheaddjit muitaledje báikkálaš servviid jođiheddjiide mii dáhpáhuvvá, ovdal preassakonferánssa Kárášjogas. Jođiheaddjit leat gulahallan riikkastivrra lahtuiguin ja muitalan duođalaš ovttasbargováttisvuođaid birra ovdal go NSR sámediggejoavku lohpalaččat mearridii botket ovttabarggu Johan Mikkel Sarain.

- Dát lea váttis dilli, ja mii áigut dárkilit ja vuđolaččat árvvoštallat maid galgat bargat ovddasguvlui, cealká Norgga Sámiid Riikkasearvvi (NSR) jođiheaddji Silje Karine Muotka.

NSR loahpaha ovttasbarggu Johan Mikkel Sarain

Denne artikkelen på norsk