Go Sámedikki ealáhuslávdegoddi meannudii Sámi ovdánahttinfoandda geográfalaš doaibmaguovllu viiddideami jagis 2004, de bohte politihkalaš oaivilat duos dás lávdegoddái, ja Rivttágis maid bođii sávaldat váldit mielde guokte giláža, Lovdáli (Løvdal) ja Stuoravatta doppe Skuhpis (Moan) foandda doaibmagulvui.

Suohkan juohká dieđuid
Sámedikki ealáhuslávdegoddi lei mielas váldit mielde dan guokte namuhuvvon giláža danne go háliida leat fárus nannemin ássama ja veahkeheamen ealáhusaid, ja nu šattaige Sámedikki ovttajienalaš mearrádus. Buohkat geat orrot doaibmaguovllus sáhttet ohcat ruđaid Sámi ovdánahttinfoanddas. Sámediggi sáddii mearrádusdieđu Rivttát suohkanii ja lea suohkana ovddasvástádus muitalit álbmogii makkár doaibmabijut gávdnojit ja guhtemuš guovllus dat gustojit.

Sámevuohta buorre ášši
Mun rámidan ságadoallievttohasaid Eva Ottesen ja Rita Roaldsen geat deattuheigga ahte Rivttágis leat golbma álbmoga, dáččat, sámit ja kveanat, ja suohkan galgá leat rámis ja ilus go lea ná. Muhto, ii lean hávski gullat Ovddádusbellodaga ságadoallievttohasa čuoččuhusa ahte fáhkkestaga mahkáš sáhttá šaddat boazoguohtuneana dat mii ovdal lea leamaš eanandoalu bealdu. Sámi ovdánahttinfoanddas ii leat mihkkege dahkamušaid boazoguohtumiin. Boazodoalloláhka dat lea mii regulere boazodoalu. Sámediggi lea jagis 2006 juolludan 5 milliuvnna foandaruđa eanandollui danne go hálida nannet ja doalahit eanandoalu sámi ássanguovlluin. Mii leat vuoruhan ja addán ruđa eanandoallodáluid huksemii vai eambbo olbmot sáhttet bargat eanandoaluin.

Suohkan mearrida standárdda
Mu mielas lea dehálaš ahte ságadoallievttohasat iešguđetge bellodagain oidnet ahte sámi áššit leat buorit áššit. Rivttágis lea sihke dáčča identitehta ja sámi identitehta, ja dat lea buorre ášši. Rivttágis berrejit mánáidgárdemánát ja skuvlamánát oahppat báikkálaš historjjá, galbbat  berrejit leat sámegillii ja suohkana márkanfievrrideamis berre positivalaččat vuosehit sámevuođa. Dán lea hui álki dahkat politihkalaččat doaibmaplánain ja strategiijaplánain nu ahte vuostálasvuođat eai beasa stuorrut. Poltitihkkárat fertejit váldit ovddasvástádusa ja mearridit movt galgá leat, ja dasto šaddá dat oassin álbmogis ja dábálaš olbmos maid.

Eambbo dieđut Ann-Mari Thomassenis

Denne artikkelen på norsk