Listtu bajimuš ja maiddái sátnejođiheaddji evttohas lea Trond Are Anti, 33 jagi, ja Deanu sámeskuvlla rektor. Trond Are ii leat ovdal leamaš gielddadási politihkkárin, muhto lea geavahan olu áiggi sihke báikkálaš sámi searvvi ja báikkálaš Sámeálbmot bellodaga doaimmaide. Dál lea váldán badjelasas ovddasvástádusa njuštit bellodagaid válggain. Trond Are lea dál maiddái NSR riikkastivrra politihkalaččat 2. jođiheaddji.

- Midjiide lea erenoamás dehálaš deattuhit dan ahte Deatnu lea máŋggakultuvrrat gielda, ja dan seammás okta daid gielddain Norggas mas lea erenoamáš ovdasvástádus dasa vai sámi giella, kultuvra, ja beaivválaš eallin mii dasa lea ektun, oažžu buoremus birgenlági, dadjá Trond Are Anti avisii Áššu.

Oktasaš listu oaivvilda Deatnu lea eará sámi gielddaid ektui bázahallan sámi gielda. Sámegiella ja -kultuvra lea uhcán vuoruhuvvon gieldda bealis. Dan duođašta earret eará dainna mo Deanu gielda lea geavahan Sámedikki jahkásaš guovttegielatruhtajuolludeami. Deanu gielda ii sáhte čilget masa badjel bealli jahkásaš 5 million kruvnnu leat geavahan. Go mii diehtit ahte sámegiella lea rašis dilis, ja gielladutkit leat einnostan ahte sámegiella jávká 100 jagi geahčen, de unnimus maid sáhttit gáibidat gielddas lea dat ahte juolluduvvon ruđat gielladoaimmaide geavahuvvojit sámegiela- ja kultuvrra seailluhit ja nannet. Deanu olu báikegottiid olbmuin eai leat odne sierra vuoigatvuođat ávkkástallat ja hálddašit lagaš guovllu luondduriggodagaid. Mii oaivvildit ahte báikegottit galget ieža hálddašit iežaset lagas mehciid, maid sii árbevirolaččat leat geavahan. Báikegottit galget hálddašit maiddái mohtorfievrruid vuodjinlobiid iežaset lagaš mehciin.

Jos Deanu gielddas galgá leat čuvges boahtte áigi, de fertet maiddái čájehit ahte mis lea beroštupmi mánáid ja nuoraid bajásšaddamii. Mii galgat maiddái movttiidahttit nuoraid máhccat ruovttugildii go leat váldán oahpu, go sii han leat gieldda boahtteáigi.

(Gáldu: Áššu)

Gulahallandieđut:
Trond Are Anti, mátketelefuvdna 40045518

Denne artikkelen på norsk