Árvvoštallama ulbmil lea leamaš geahčadit doarjjaortnega ollislaččat, dás maiddái kártet buot guoskevaš oassálastiid ovddasvástádusa ja rolla oahpponeavvoráhkadeami oktavuođas. Sámediggi háliidii kártet sámi oahpponeavvoráhkadeami beavttu, leat go oahpponeavvoráhkadeami strategalaš plána ulbmilat ollašuhttojuvvon, ja lea go dárbu rievdadit gustovaš doarjjaortnega.

- Árvvoštallama duogáš lei Sámedikki ballu sámi oahpponeavvuid buvttadeami, ráhkadeami ja gárvvisteami bevttolašvuođa dáfus. Lágádusat ja eará oahpponeavvobuvttadeaddjit leat rahčan heajos dinenvejolašvuođaid geažil oahpponeavvoráhkadeamis, ja sis leat leamaš váttisvuođat fidnet fágaolbmuid ja čađahit oahpponeavvoprošeavttaid, dadjá sámedikki presideanta Aili Keskitalo.

Sámi oahpponeavvuid ráhkadeapmi lea viiddis ja dan mihtilmasvuohtan leat ollu ja máŋggalágan hástalusat. Proseassa dehálaš oassálastit leat Sámediggi mas lea ovddasvástádus doarjjaortnegis, lágádusat ja eará oahpponeavvobuvttadeaddjit geat čađahit prošeavttaid, Sámi allaskuvla mas lea ovddasvástádus gealbudeamis ja skuvlaeaiggádat geat geavahit oahpponeavvuid.

Sámediggái lea oahpponeavvoráhkadeapmi deaŧalaš oččodeamis buori sámi skuvlla. Sámediggeráđđi lea áigodaga 2006-2009 politihkkaprográmmastis deattuhan ahte sámi oahpponeavvuid árvvoštallan ja čuovvoleapmi galgá leat dán áigodaga guovddážis. Árvvoštallama vuođul áigu Sámediggi ráhkadit ođđa strategalaš plána sámi oahpponeavvoráhkadeami várás. Sámediggi háliida nannet olles sámi oahpponeavvuid ráhkadanproseassa, ja dan mii fertet dahkat ovttas buot guovdilis ráhkadeaddjiiguin, loahpaha Keskitalo.

Finnut Consult AS lea čađahan árvvoštallama Sámedikki ovddas. Sámediggeráđđi meannudii árvvoštallanraportta geassemánus 2007 ja mearridii ahte dat galgá leat vuođđun ođđa sámi oahpponeavvoráhkadeami strategalaš plánii. 

(Gáldu: Sámedikki preassadieđáhus)

Gulahallanolmmoš:
Aili Keskitalo, Sámediggepresideanta 78 47 40 00 / 971 29 305

Loga árvvoštallama Sámedikki neahttasiidduin