Nissonat rievdadit vuogádagaid
– Go nissonolbmuin leat politihkalaš luohttámušdoaimmat, de sii rievdadit politihkalaš vuogádagaid ja ásahusaid vuogádagaid nu ahte dat heivejit nissonolbmuide. Politihkalaš vuogádagat ja ásahusat fertejit hárjánit dasa ahte áhpehisvuohta lea dábálaš nissonolbmo eallimis. Muotka mielas lea áibbas dárbbašlaš láhčit dili ja heivehit politihkalaš doaimmaid nu ahte nissonolbmot ja mánnáolbmot sáhttet doaibmat politihkas. Muotka jáhkká eambbo nissonolbmot dustet searvat politihkkii go oidnet movt politihkalaš vuogádagat heivehuvvojit sidjiide.

Sámediggepresideanta Aili Keskitalo lea čoahkkinastán NSR viiddiduvvon jođihangottiin ja muitalan ahte son juovllaid rájes áigu váldit njeallje mánu áhpehisvuođavirgelobi go lea riegádahttimin máná. Sámedikki vuođđonjuolggadusaid olis galgá Sámedikki dievasčoahkkin váljjet ođđa presieantta mii galgá doaibmat dan botta go presideanta jávká muhtun áiggi.

Jođihangoddi mielas evttohit Jonassen
NSR joavkojođiheaddji Lene Hansen cealká ahte NSR viiddiduvvon jođihangoddi lea meannudan ássi. Viiddiduvvon jođihangottis leat fárus NSR ráđđelahtut, joavkojođihangoddi ja organisašuvnna jođiheaddjit. Sii leat buohkat mielas evttohit ahte ráđđelahttu Jarle Jonassen (57) válljejuvvo sámediggepresideantan Keskitalo virgelobis. Jonassen várra válljejuvvo Sámedikki dievasčoahkkimis skábmamánus. Jonassen lea badjeolmmoš Plássjes eret ja lea leamaš Sámedikkis 1989 rájes. Lene Hansen muitala maiddái ahte jođihangoddi lea rávven válljet sámediggeáirasa Ann-Mari Thomassen sadjásaš ráđđelahttun dan botta go Jonassen lea presideanta ja Keskitalo lea virglobis. Thomassen lea doaibman sámediggeráđis dan botta go ráđđelahttu Randi A. Skum oaččui máná ja lei virgelobis mannan jagi. Hansen cealká ahte NSR jođihangoddi oaivvilda dán leat buorren ja dássidis čoavddusin virgelobi áiggi. – Politihkalaš bargu joatká seammaláhkái go ovdal, cealká Lene Hansen.

Nanus ja hárjánan sámepolitihkkár
Jarle Jonassen lea guhká leamaš sámepolitihkkár ja sus leat leamaš luohttámušdoaimmat eanaš dásiin NSR siskkobealde. – Mii leat hui rámis go beassat evttohit Jonassen sámediggepresideantan dán virgelohpeáigodaga, cealká NSR jođiheaddji Silje Karine Muotka. – Lea vuosttaš háve go máttasápmelaš lea sámediggepresideanta, joatká Muotka. – Mii luohttit ollásit dasa ahte Jarle Jonassen hálddaša dán barggu. Son lea nanus NSR-politihkkár ja mii leat hui duhtavaččat su bargguin ja duhtavaččat go son lea mielas leat sámediggepresideanta.

Jarle Jonassen cealká kommentáras ahte vuollegašvuođain váldá badjelasas barggu sámediggepresideantan Keskitalo virgelohpeáiggis, ja lea ilus go NSR jođihangoddi lea čájehan sutnje luohttevašvuođa. – Áiggun geahččalit bargat nu bures go máhtán ja bargat daid bargguid maid sámediggepresideanta galgá barggat, ja ovttasbaragat sihke sámediggeráđiin, Sámedikki bargiiguin ja nuppiin áirasiiguin, cealká Jonassen.

Gulahallandieđut:
Joavkojođiheaddji Lene Hansen, telefon: 97 77 34 90
NSR-jođiheaddji Silje Karine Muotka, telefon: 98 48 75 76
Ráđđelahttu Jarle Jonassen, telefon: 97 58 16 37
Sámediggeairas Ann-Mari Thomassen, telefon: 95 16 89 41
Sámediggepresideanta Aili Keskitalo, telefon: 97 12 93 05

Eambbo Jarle Jonassen birra
Eambbo Ann-Mari Thomassen birra

Denne artikkelen på norsk