- Mii dieđusge buohkat mieđihit dasa ahte ruoŧabealde sápmelaččain, dološ vieru mielde, leat boazodoallovuoigatvuođat Sis-Romssas, nu go maid Norggabealde boazosápmelaččain leat Ruoŧa bealde. Ođđa Norgga-Ruoŧa baozoguohtunkonvenšuvdna galgá reguleret movt dáid áššiid hálddašit praktihkalaš dilis, cealká sámediggepresideanta Aili Keskitalo.

Maŋemus áiggiid leat Boazodoallohálddahusa ja Saarivuoma čearu soabatmeahttunvuođat Átlejávrri guovllus Sis-Romssas gullon ja oidnon medias. Riikkarájá gidden lea čuohcan sihke Norggabealde ja Ruoŧabealde boazodollui dáppe. Ođđa boazoguohtunkonvenšuvdna lea dál gárváneamen, ja Norgga ja Ruoŧa sámedikkit servet dán bargui. Jos gáibiduvvo eambbo vuoigatvuohta, dološ vieru mielde, go dat vuoigatvuohta maid ođđa konvenšuvnna guovlluprotokollat nannejit, de dieđusge sáhttá dáid áššiid vuodjit dikki ovdii.

- Gierdevašvuođain ja jierpmálašvuođain mii fertet gierddahallat guohtunriidduin mat dál leat Áltejávrris. Ságastallamiid bokte lea vejolaš gávdnat čovdosiid. Jos bealit oaivvildit ođđa konvenšuvdna ii čilge vuoigatvuođadiliid doarvái bures, de lea vejolaš ahte duopmostuollu sáhttá mearridit ášši. Ii gánnát dálá riidduid lasihit, loahpaha Aili Keskitalo.

(Gáldu: Sámedikki preassadieđáhus. Sámegillii: Norgga Sámiid Riikkasearvi)

Gulahallanolmmoš:
Aili Keskitalo, Sámedikki presideanta, 97129305

Dárogillii