NORGGA SÁMIID RIIKKASEARVVI PREASSADIEÐÁHUS (NSR)

Norgga Sámiid Riikkasearvi (NSR) ollásit doarju ja luohttá sámediggepresidentii Aili Keskitaloi guhte lea sámi servodaga ovddimus luohttámušolmmoš. Sámediggepresideanta bargá hástaleaddji barggu olles sámi servodaga ovddas. Mii ollásit doarjut sámediggepresideantta ja NSR sámediggejoavkku barggu sihkkarastit ja cadahit NSR politihka Sámedikkis ja servodagas mudui.

NSR gáibida ahte sámediggepresideantta bargu sámi servodagas adnojuvvo árvvus. Mii eat mange láhkái sáhte doarjut fasttes persuvdnafallehemiid mat earrat eará leat boahtán ovdan media bokte. Sámepolitihkalaš ságastallan ja servodathuksen berre dáhpáhuvvat corgadis ja govttolaš vuogi mielde. Eat sáhte dohkkehit ahte min ovddimus luohttámušolmmoš fallehuvvo dán láhkái. Dákkár heajos politihkalaš láhtten ii daga buori sámi servodahki.

Mii leat rámis ja ilus go mis lea ná buorre luohttámušolmmoš ja sámediggepresideanta go Aili Keskitalo. Su jodihanvuohki ja luondu lea erenoamáš heivvolaš. Son ovddida áššiid vuohkkasit ja corgadit ja dovdá áššiid bures. Váttis ja measta veadjemeahttun barggut eai baldde su go son lea cielga jodiheaddji.

NSR šálloša ahte sámi servodat šaddá gierdat dákkár vuollegis ságstallandási mii lea heahpat, iige moktege dohkálaš.

Gulahallan:
Silje Karine Muotka, mobil 98487576
Preassagovat
Dát artihkkal dárogillii