Máhttolokten – Sámi oahppoplánaboktosis ja sámi oahpaheddjiid bargodilli

Sámedikki bajásšaddan- ja oahpahuslávdegoddi lea meannudeamen oahpahusprinsihpaid Máhttoloktema – Sámi oahppoplánabuktosis. Norgga Sámiid Riikkasearvvi (NSR) sámediggeáirras Synnøve Solbakken-Härkönen lea suoivaáššejođiheaddji áššis.

NSR lea duhtavaš go dál gávdnojit prinsihpat olles vuođđooahpahusa ektui Máhttolokten – Sámi oahppoplánabuktosis. Oahpahusa prinsihpat leat hui dehálaččat sámi joatkkaoahpahussii mas ovdal Máhttoloktema eai gávdnon makkárge bajit ulbmilat dahje prinsihpat sámi oahpahusa várás. NSR oaivvilda goit ge ahte boahtte háve go sámi oahppoplána galgá ođasmahttojuvvot ahte sámi oahppoplánabuvttus hukse sámi giela, kultuvrra ja servodaga ala ja ii leat dušše heivehuvvon buvtta našunála oahppoplánabuktosis.

NSR deattuha maid ahte buorit rámmaeavttut dego oahpponeavvut, oahpaheaddjiid gelbbolašvuođa nannen ja plánenáigi leat dehálaš eaktun Máhttoloktema – Sámi oahppoplánabuktosa čađaheapmái.

Solbakken-Härkönen cuoigu ahte oahpaheaddjit geat oahpahit sámegielas dahje sámegillii dárbbašit eanet áiggi ráhkkanit oahpahusdiimmaide oahpponeavvováilli geažil ja liigebargguid geažil maid jorgalandárbbut dagahit. Sis lea danne leamaš konverterenáigi. Dat lassi ráhkkananáigi jávkkai 01.08.06. go ođđa bargošiehtadus mearriduvvui oahpaheaddjeorganisašuvnnaid ja Kommunenes Sentralforbund gaskkas Dan atná NSR dohkketmeahttumin, ja ávžžuha šiehtadallanbeliid váldit vuhtii sámi oahpaheddjiid bargodili boahtteáiggis. Konverterenáiggi massin lea áittan sámegiela ja sámi servodaga boahtteáigái. Dan sadjái go heaittihit konverterema, livččii konverterenáigi galgan lasihuvvot dassá go oahpponeavvodárbu lea gokčon.  

Gulahallan:
Synnøve Solbakken-Härkönen Tlf: +47 416 45 73
Preassagovva Synnøve Solbakken-Härkönen
Dát artihkkal dárogillii