- Lean hui duhtavaš, sihke bohtosiin ja konsultašuvdnaproseassain Birasgáhttendepartemeanttain. Dát lea eahpitkeahttá vuoitun sámi vuoigatvuođaide. Evttohus mearkkaša ahte sámi beroštusat galget fuolahuvvot buot areálaplánemiin, dadjá sámediggepresideanta Aili Keskitalo.

Vuosttaldanvuoigatvuođa lassin Sámediggái sisttisdoallá ođđá plána- ja huksenláhka earret eará dan ulbmilmearrádusa, ahte buot areálaplánen galgá sihkkarastit sámi kultuvrra, ealáhusdoaibmama ja servodateallima luondduvuđđosa. Láhka dahká maid čielggasin ahte sámi boazodoallu lea dakkár areálageavaheaddji mii galgá fuolahuvvot areálaplánaproseassain. Konsultašuvnnat Sámediggeráđi ja Birasgáhttendepartemeantta gaskkas leat čađahuvvon skábmánu 2006 rájes cuoŋománu 2007 rádjai, ja bealit leat dál soabadan loahppadokumeantta mas leat oasit láhkaevttohusas ja mearkkašumiin. Sámediggeráđđi lea sádden evttohusa Sámedikki ealáhus- ja kulturlávdegotti meannudeapmái.

- Dát proseassa čájeha ahte Sámediggái lea áibbas vejolaš soabadit Norgga eiseválddiiguin konsultašuvnnaid bokte. Eaktun lea ahe álbotrievttálaš geatnegasvuođat biddjojuvvojit vuođđun ja ahte proseassas lea vejolaš fidnet buot dieđuid maid mii darbbašit ja ahte goappašat bealit čájehit rabasvuođa, dadjá Keskitalo. 

(Gáldu: Sámedikki preassadieđáhus)

Gulahallan:
Aili Keskitalo, Sámediggepresideanta  Telefon 78 47 40 00 971 29 305 

Aili Keskitalo preassagovat

Dát artihkkal dárogillii