Sámiráđi evttohii ovttas Inuihtaid organisašuvnnain, Inuit Circumpolar Councilin, Lars-Anders Baer Bissovaš forumii. Mannan bearjadaga Baer válljejuvvui ON:a Álgoálbmogiid bissovaš forumii áigodahkii 1.1.2008-31.12.2010.

ON:a ekonomálaš- ja sosiála ráđi jođiheaddji nammadii gávcci lahttu ja Baer šaddá ovddastit Árktalaš guovllu forumas mas Sámiráđi evttohas Ole Henrik Magga lei vuosttas jođiheaddji.

Baer lea leamaš guhkit áigge Sámiráđi lahttu ja lea maid jođihan organisašuvnna. Sámiráđi dálá jođiheaddji, Pauliina Feodoroff, lea duđavaš go Sámiráđi evttohas válljejuvvui nuppes.  – Lars-Anders Baer lea Sámiráđi ovddas bargan ollu riikkaidgaskasaš bargguid ja mun dieđan ahte son lea rivttes olmmoš Bissovaš forumas. 

Sámiid 18. konfereansa ovddidii Baer evttohassan jo jagis 2004. – Lea guhkes áigge ovddidanbargu mii dál lea lihkostuvvan. Ja dát čálmmastuhtá ahte ollu Sámiráđi bargu dahkko ja ollašuvvá guhkkit áigge perspektiivvas, Feodoroff nanne.

Sámiid konfereansa lea Sámiráđi bajimus mearrideaddji orgána. Sámiid konfereansa lágiduvvo juohkke njealját jagi. Maŋimuš konfereansal lágiduvvui Aváhkkis, Norgga bealde. Sámiid 19. konfereansa lágiduvvo Roavvenjárggas 2008:s.

(Gáldu: Sámiráđi preassadieđáhus)