SÁRDNI GÁIVUONA SÁME SEARVVI NSR ÁVVUDANFEASTTAS

Lea stuorra gudni munje Norgga Sámiid Riikkasearvvi jođiheaddjin cealkit dearvuodaid Gáivuona sáme searvái – NSR ja sávvat lihkku 30 jagiin. Mu buvttán riikkasearvvi dearvvuođaid ja sámediggepresideantta Aili Keskitalo dearvvuođaid. Mis lea dáppe dehálaš ja ealli ávvudeaji/jubilánta. Ja mun lean hui ilus go searvvi vuosttaš jođiheaddji Øystein Steinlien lea dáppe odne eahkes. Go Steinlien álggii searvvi vuosttaš jođiheaddjin, diđii go Steinlien dalle man dehálaš dát searvi šaddá? Golbmalogi jagi ávvudeaddji/jubliánta lea oláhan stuorra ja buriid bohtosiid.

Riikkačoahkkinmuittut

Mun vuosttaš NSR riikkačoahkkin lei dáppe Olmmaivákkis. Mu mielas lei stuorra čoahkkin. Olles Ája lei álbbasi dievva, mu muittu mielde goit lei áibbas dievva.  Gaivuona same searvi - NSR lágidii dán riikkačoahkkima jagis ovccinuppelohkái-ovccilogi-guokte ja dáppe lei erenoamáš mokta, ja mun lean maid máŋgga eará háve beassan vásihit dan erenoamáš movtta mii lea čoahkimiin dáppe Olmmáiváikkis.

Mu vuosttaš riikkačoahkkin lei erenomáš munnje. Mun dovden movt váibmui julká go galgen mannat bajás sárdnestullui – váibmui julkigođii juo diibmobeale ovdal go galgen sárdnestullui. Go bohtet sárdnestullui, de ledjen nu suorganan ja – measta paralyserejuvvon. Mun galgen rámiidit ovtta nuorra čeahpes gándda gii čohkkái riikkastivrras, namalassii Martin Urheim, muhto mun čužžon áibbas jaska – inge nagodan cealkit maidege. Mun celken dušše æh-æh ja buohkat riikkačoahkkinlanjas imaštalle ja gehčče munnje. Álggos buohkat gehčče, moddjájedje ja geahččaledje movttiidahttit, ja de buohkat heahpanedje. Muhto, mun nagodin čohkket jurddagiid ja cealkit dan maid mun áigon cealkit nuorra herr Urheim birra ja buohkat doško gieđaid/applauderedje – dieđusge go lei nu buorre go viimmat nagodin dadjat juoga. Mun muittán hui bures dán riikkačoahkkima. Muittán suova mii bođii dolas, luohti mii gullui geasse-ijas, hássuin ledje varas suoinnit, ja mun muittán hui ollu hávskes olbmuid. 

Váikkuheaddji sámepolitihkkárat

Máŋga olbmo leat váikkuhan mu sámepolitihkalaš bargui. Ja máŋggas leat leamaš eret Gáivuonas. Henrik Olsen, Janne Hansen ja Håkon Eriksen leat váikkuhan munnje ja movttidan mu ja addán munnje movtta bargat sámi áššiiguin. Sii leat sihkkarit maid váikkuhan eará olbmuide. Reidar Solberg lea báikkálaš searvvi jođiheaddji gean muittán, čielggas ja gievrras jođiheaddjin. Pionera ja kulturbargi Mary Mikalsen Trollvik lea maid váikkuhan máŋgasii. Son lea erenoamáš gievra ja čeahpes mearrasámi nisson gii lea bargan stuorra barggu sámi servodaga ovddas.

NSR báikkálaš searvvi ovddeš jođiheaddji dáppe lea sámediggeáirras Tor Mikalsen. Mun anan árvvus Tor, mu politihkalaš kollega. Son lea hui čeahppi leat oidnosis. Munnus leat dávja buorit ságastallamat ja diskušuvnnat ja dat lea hui dehálaš. Mun dieđán ahte son lea politihkalaš allrounder ja ahte sus bohtet ollu buorit politihkalaš bohtosat. Joavkojođiheaddji Lene Hansen lea nubbi eará resursaolmmoš gii dahká NSR politihka duohtan sámediggesystemas. Son lea NSR jođihangottis mielde ja váikkuha dan politihkkii maid NSR čađaha guokteduhát-čiežas, guokteduhát-gávccis  ja guokteduhát-ovccis, ja sávvamis máŋgá máŋga jagi vel. Geir Tommy Pedersen, son lea nu go diehtibehtet sámediggepresideantta Aili Keskitalo lagamus politihkalaš ráđđeaddi. Son lea maid jođihan NSR dan áiggis go Sven-Roald Nystø šaddai presideanta. Mn nannen ja duođaštan ahte GSS olbmot leat mávssolaš olbmot NSRs.

Gáivuona sáme searvvi ođđa jođiheaddji Camilla Brattland lea dakkár olmmoš mii buktá bargomovtta Sápmái, dan gal lea álki einnnostit. Anita Lervoll lea nisson gii boahtteáiggis sihke gullu joa oidno eambbo. Son jođiha Romssa Sámiid Searvvi-NSR.

Hástalusat ovddasguvlui

Mu mielas olbmuin dáppe lea erenoamáš dáhttu. Olbmuin dáppe lea erenoamáš dáhttu rievdadit ja buoridit iežas dili ja earáid dili. Mearrasámi fápmu ja vuoibmi lea dovdomearka. Riddu Riđđu, Gáivuona sáme nuorat, gákti, Ája, borramuškultuvra ja Čáhpot – dát leat ollu buorit ovdamearkkat.

Lean hui rámis ja ilus go beasan sávvat sáme searvái lihkku golbmalogi jagiin, ja mun illudan čuovvut searvvi bargguid golbmalogi jagi vel oddasguvlui, ja ovttasbargat ođđa olbmuiguin dáppe, geain lea mearrasámi áŋgiruššan/engasjemeanta ja dovdet mearrasámi árbevieruid.

Mis leat ain ollu oktasaš hástalusat maiguin mii fertet bargat. Sámi vuoigatvuođalávdegoddi buktá evttohusa čakčat ja dat šaddá dehálaš ášši midjiide buohkaide. Giella, kultuvra ja mearrasámekultuvra lea ain ealás ja Gáivuona sáme searvi lea nana ladni ja ofelaš ovddasguvlui.

Sávan hui ollu lihkku!

Dát artihkkal dárogillii