Mannan vahkku semináras maid Sámedikki lágidii Sámeálbmot foandda birra bohte ovdán iešguđetge oaivvilat mo foandda galggašii buoremusat ávkkástallat. Sámeálbmogis leat ollu hástalusat giela ja kultuvrra ektui ja maiddai servodat ovdáneamis. Dáruiduhttin ja nubbi máilmmesoahti lea garrasit vaikkuhan daidde geat odne leat vuorasolbmot, ja mun jáhkán máŋggasat leat vuohttán ahte sámiid máhttu ii leamaš man ge veara stuorra servodagas. Jos galggašii sihke ovdinahttit sámegiela ja kultuvrra ja atnit min vuorrasiid árvvus, de jáhkán ahte oassi foanddas sáhttá geavahuvvot deavdit guktui beliid. Dat lea geavahit návccaid čohkket ja dokumenteret árbevirolaš máhtu ja seammás doalvut dán máhtu dálá buolvvaide giela geavaheami čađa.

Isak Saba guovddáš lea ovtta dain institušuvnnain mii bargá viššalit čohkket báikkálaš sámegiela geavaheami mii lea čatnon guovllu vuođđoealáhusaide ja duodjái. Ná Isak Saba guovddáš čohkke ja vurke árbevirolaš máhtu ja seammás atná árvvus vuorraset olmmuid čehppodaga ja máhtu – aiddo dan máhtu maid eiseváldit eai atnán manin ge dáruiduhttima áigge. Konkrehta ovdamearka dasa lea diibmá almmuhuvvon girji “Unjárgga gákti” gos Isak Saba guovddáš prošeavttainis rávkkai beroštumi Unjárgga gáktái dološ govaid ja goarrunkurssaid bokte. Nuorat gearde besse báikkálaš gávttečehpiin oahppat goarrunkoanstta ja gáktečeahpit besse čevllohallat iežaset erenomaš máhtuin ja dieđuin.

Mu čuožžuhus lea ahte dákkár ja sullasaš prošeavttaiguin Isak Saba guovddáš doaimmat ollet bures olgobeallái guovddáža seinniid ja báikeolbmot vásihit viimmat ahte sin čehpodat atno árvvus – justa dat vásáhus maid dološ skuvla guhken eret lea nagodan.

Nubbi ovdamearkka lea EALÁT prošeakta gos badjeolbmuid máhttu ja diehtu mánná giehtalágaid dutkamiin. Dát maid morihahttá beroštumi olbmuid gaskkas ja muohtatearpma digáštallan ja dálkemerakkaid digáštallojit jietnoseabbut odne go guhkes áigái.

Dákkár vásáhusaid fertešeimmet atnit muittus go álgit geahčadit masa Sámeálbmot foandda vuoitu gálggášii geavahuvvot.