Álttá Sámiid Searvvi, miellahttolohkku lassánii 33 % 2006:s, ja searvvis leat dál badjelaš 100 miellahttu. – Mii leat bidjan johtui olu doaimmaid, ja dan bokte lokten beroštumi sámiid searvái Álttá servvodagas, dadjá Álttá Sámiid Searvvi jođiheaddji Brita Julianne Skum.

Sámi viessu addán vejolašvuođaid

Álttá Sámiid Searvvis bidje máŋggaid jagiid čađa olu návccaid huksen dihte sierra sámi viesu Áltái. Diibmá viimmat ollašuvvai dát ja Álttá sámit ožžo sierra viesu. Brita Julianne Skum dadjá ahte ii leat eahpádus ge ahte sihke Sámi mánáidgárdi ja Álttá Siida lea olu váikkuhan miellahttolassáneapmái. – Viessu lea addán vejolašvuođaid sámiid searvái lasihit doaimmaid, dadjá Skum.  

Brita Julianne Skum muitala ahte searvi lágida mánnosaččat kafeaid. – Kafeafálaldagain hálidit fállat Áltta sámiide čoahkkananbáikki ja sosiála ovttastallama eará sámiiguin, son dadjá.

Lágidit olu kurssaid

Álttá Sámiid Searvvis leat maid hui olu kurssaid lágidan mannan jagi, ja searvi lágida eanas duodje- ja giellakurssaid.– Mii oaidnit ahte beroštupmi sámegielkurssaide lea stuoris Álttás. Mis leat oasseváldit buot agiin, ja oaidnit ahte ollugat geat leat massán sámegiela dáruiduhttima geažil dál hálidit váldit dan ruovttoluotta, muitala Brita Julianne Skum. Son muitala ahte maiddái Álttá suohkanbargiin lea beroštupmi oahppat sámegiela.

Giella- ja kulturseailluheapmi guovddážis

Skum dadjá ahte giella- ja kulturseailluheapmi lea guovddážis Álttá Sámiid Searvvi doaimmain. Kulturbarggu oaivvilda Skum leat hui dehálaš oassi sámiid searvvi doaimmas, ja son jáhkká dán hui dehálažžan seailluhan dihte sámiid searvvi boahtteáiggis. – Mun balan ahte sámiid searvi nohká jus eat doalat kulturdoaimmaid maiddái searvvis. Eat sáhte vuordit ahte giella- ja kulturguovddážat galget váldit buot badjelasas ge, váruha Álttá Sámiid Searvvi jođiheaddji.     

Searvvis leat olu plánat ovddasguvllui. Sis lea earret eará áigumuš oainnusin dahkat mearrasámi duodjeárbevierud. – Mii áigut bargat oččodit mielde olbmuid Álttá guovllus mat dovdet dáid árbevieruid, ja atnit návccaid ealáskahttit ja ovdánahttit mearrasámi duoji, Brita Julianne Skum muitala.

Ávžžuha eanehiid searvat miellahttun

Maiddái ođđajagis leat olbmot váldán oktavuođa Skumain ja hálidan searvat miellahttun. – Olbmot hálidit doarjut sámiid searvvi ja leat mielde ovddideamin sámevuođa. Dát lea reakšuvdnan rasisma vuostá man birra Álttás leamaš olu sáhka, jáhkká Brita Julianne Skum.

Brita Julianne Skum ávžžuha Álttá guovllu sámiid dieđihit miellahttun Álttá Sámiid Searvái. – Searvi bargá sihke kulturdoaimmaiguin ja bargá politihkkálaččat ovddidit sámepolitihka. Go searvá miellahttun, de beassá mielde váikkuheamin sámepolitihkkii ja kulturdoaimmaide, loahpaha Skum.